बालकृष्ण खाँणलाई तत्काल कारवाही नगर्ने कांग्रेसको निर्णय

काठमाडौं । नेपाली कांग्रेसले शरणार्थी प्रकरणमा पक्राउ परेका पार्टीका केन्द्रीय सदस्य बालकृष्ण खाँणलाई तत्काल कारवाही नगर्ने निर्णय गरेको छ । आज बसेको पदाधिकारी बैठकले सो निर्णय गरेको हो ।

बैठकपछि पत्रकारहरुसँग कुरा गर्दै सहमहामन्त्री जीवन परियारले खाँणले अनुसन्धानलाई सघाइरहेको बताए। पक्राउ पर्ने बित्तिकै दोषी भन्न नमिल्ने उनको भनाइ छ ।

उनले भने ‘उहाँ बुटवल जानुभएको थियो । त्यतैबाट भाग्न पनि सक्नुहुन्थ्यो । तर निवासबाटै पक्राउ पर्नुभयो । उहाँले अनुसन्धानमा सघाइरहनुभएको छ । हामीले अदालतको निर्णय पर्खिनुपर्छ ।’

कांग्रेस दोषीलाई उम्काउने पक्षमा नभएको उल्लेख गर्दै उनले अनुसन्धानलाई पार्टीले सघाउनुपर्नेमा सबै सहमत रहेको बताए ।