कांग्रेस समन्वय विभागमा विवादितको मनोनयनः बिगार्ने साउद, दोष जति देउवाको टाउकोमा

एनपी साउद, मुकेश काफ्ले र बिष्णु धिताल

काठमाडौं । नेपाली कांग्रेसको शुभेच्छुक संस्था समन्वय विभागमा ४८ जनालाई मनोनीत गर्दा बैंकिङ कसुरका दोषी बिष्णु धिताल र लोडसेडिङका मतियार मुकेश काफ्लेलाई समेत राखिएको बिषय ब्यापक विवादमा परेको छ । पार्टी सभापति शेरबहादुर देउवाले विवादितहरुलाई मनोनयन गरेकोमा चौतर्फी आलोचना भइरहेको छ ।

विवादितहरुलाई राखिएको बिषयको बिरोध भएपछि सभापति देउवाले ती ब्यक्ति कसरी परे भनेर पार्टीमा खोजीनीति गर्दा विभागका प्रमुख एनपी साउदले उनलाई मनोनयन गरेको पत्ता लागेको थियो । बैंकिङ कसुरका दोषी धिताललाई कांग्रेसको विभागमा मनोनीत भएर मुद्दामा प्रभाव पार्ने उद्देश्य रहेको थियो । काफ्लेलाई दैनिक १८ घन्टा लोडसेडिङ गराएर देशलाई अन्धकार बनाएको आरोप लागेको थियो । त्यस आरोपलाई प्रतिरक्षा गर्न पनि उनलाई पार्टीको आडभरोसा आवश्यक भएकाले उनले पनि साउदलाई प्रभावमा पारी मनोनयन हुन सफल भएका छन् ।

साउदले यी दुवै विवादित पात्रबाट लाभ लिएर मनोनयन गरेको आरोप लागेको छ । स्वयं सभापति देउवा पनि धिताल र काफ्लेको मनोनयनबाट असन्तुष्ट रहेको नेपाली कांग्रेसकै एक नेताले बताएका छन् । साउदले नै विभागका ४८ जनाको नामावली संकलन गरेका हुन् । उनको विश्वासमा पर्दा सभापति देउवा अप्ठेरोमा परेका छन् । धिताल र काफ्लेलाई गरिएको मनोनयनले पार्टीकै साखमा धक्का पुगेकोमा पनि देउवा साउदको कार्यबाट रुष्ट भएका छन् ।

बिहीबार सभापति देउवाद्वारा कांग्रेसको विधान, २०१७ (संशोधन सहित) को धारा २५ (९) बमोजिम समन्वय विभागमा मनोनीत गरिएको थियो । सभापति देउवाले विभागको उपप्रमुखमा मनोनीत गरेका बिष्णुप्रसाद धिताल एपेक्स डेभेलपमेन्ट बैंकबाट अनियमित रुपमा कर्जा प्रवाह गरेको आरोपमा २०७४ चैत २ मा पक्राउ परेका थिए । उनीसहितका १३ जनालाई एपेक्स बैंकका दरबार मार्ग, लोकन्थली, इटहरी, सुर्खेत र नेपालगञ्ज शाखाहरूबाट अनियमित प्रक्रियाबाट कर्जा प्रवाह गरी बैकलाई एक अर्ब ५० करोड ९६ लाख ३३ हजार ९ सय ८४ रुपैयाँ हानी पु¥याएको भेटिएपछि नेपाल प्रहरीको केन्द्रीय अनुसन्धान ब्यूरो(सीआइबी)ले पक्राउ गरेको थियो ।