फागुन १४ मै फर्कियो नेकपा, राष्ट्रियसभामा वामदेव गौतमलाई पठाउने निर्णय

काठमाडौं ।  नेपाल कम्युनिष्ट पार्टी (नेकपा) को आज बसेको सचिवालय बैठकले उपाध्यक्ष वामदेव गौतमलाई राष्ट्रियसभाको रिक्त एक सदस्य पदमा मनोनयन गर्ने निर्णय गरेको छ । पार्टीको निर्णयपछि प्रधानमन्त्री केपी शर्मा ओलीले गौतमलाई राष्ट्रियसभाको सदस्य पदमा नियुक्त गर्न राष्ट्रपतिसमक्ष सिफारिस गर्नेछन् ।

गौतमलाई पठाउने निर्णयपछि अर्थमन्त्री डा. युवराज खतिवडाको राष्ट्रियसभा यात्रामा पूर्णबिराम लागेको छ । र, उनी अब मन्त्रीबाट पनि भदौ २१ बाट पदमुक्त हुनेछन् । सांसद नभएको ब्यक्ति ६ महिनाभन्दा बढी समय मन्त्री हुन कानुनतः पाइँदैन । वामदेव गौतमलाई राष्टियसभामा पठाउने निर्णशय नेकपा सचिवालय बैठकले २०७६ फागुन १४ मै गरेको थियो । जुन निर्णय प्रधानमन्त्री ओलीले नमानेपछि नेकपामा विवाद बढ्दै बढ्दै उनको राजीनामा माग्ने तहसम्म पुग्यो, आजको सचिवालय बैठकले गएको फागुन १४ गरेकै निर्णयलाई दोहोर्याएको छ । त्यतिबेलै गौतमलाई राष्ट्रियसभामा पठाएको भए पार्टीमा विवाद बढ्दैनथ्यो भन्छन् नेताहरु ।

नेकपाका केन्द्रीय सदस्य तथा विदेश विभाग उपप्रमुख समेत रहेका विष्णु रिजालले सामाजिक संजालमा लेखेका छन–‘नेकपामा विवादको सुरुवात नै कमरेड वामदेव गौतमलाई राष्ट्रियसभामा पठाउने ०७६ फागुन १४ को सचिवालय बैठकको सर्वसम्मत निर्णय कार्यान्वयन नगर्नाले भएको थियो । ६ महिनासम्म अनेक प्रयोग र खेलपछि अन्ततस् पार्टी निर्णय कार्यान्वयन हुने स्थिति बन्नुलाई पनि खुसीकै कुरा मान्नुपर्छ । कम्युनिस्ट पार्टीमा सामूहिक नेतृत्व र कमिटी प्रणाली नै निर्णायक हुने परिपाटी स्थापित भइरहने अपेक्षा गरौं ।’