भिभान्ताको गोप्य भेलाले कांग्रेसमा भूईचालो, आरजुलाई महामन्त्री बनाउन देउवाले सभापति छाड्ने  !

काठमाडौं । कोरोना महामारीले काठमाडौं उपत्यकामा भयावह रुप लिइरहँदा प्रमुख प्रतिपक्षी दल नेपाली कांग्रेसभित्र महाधिवेशनका कारण आन्तरिक महाभारत मच्चिरहेको छ । आगामी फागुन ७ मा उदघाटन गर्नेगरी मिति तय भएको महाधिवेशन कोरोना महामारीलाई देखाएर सार्ने खेल भइरहेको छ । फागुनको महाधिवेशन सार्ने पक्षमा देउवा छन् । २०७६ फागुनमा कार्यकाल सकिएका देउवाले १ बर्ष कार्यकाल बढाएका थिए । बिधानको ब्यवस्था अनुसार उनले १ बर्ष बढाएका हुन् । बढाएको १ बर्षे अवधिभित्र फागुनमा महाधिवेशन गर्नुपर्नेमा कोरोनाको बहानामा थप ६ महिना पर सार्ने दाउमा उनी छन् । २०७८ भदौमा महाधिवेशन नहुने हो भने संविधान संशोधन गरेर मात्रै पार्टीको बैधानिकता जोगाउनुपर्ने हुन्छ । त्यसैले ढिलोमा पनि अर्को बर्ष भदौमा कांग्रेसको महाधिवेशन गर्नुपर्ने बाध्यता देउवासामु छ । 

विगत महाधिवेशनमा पार्क भिलेज होटल बुढानीलकन्ठमा हुने कांग्रेसका गोप्य भेलाहरु अहिले अर्बपति ब्यापारी विनोद चौधरीको भिभान्ता होटल सानेपामा हुन थालेका छन् । महाधिवेशनको चर्चासँगै कांग्रेसका बिचौलिया र ब्यापारी सक्रिय हुन थालेका छन् । अघिल्लो हप्ता भिभान्ता होटलमा कांग्रेस सभापति शेरबहादुर देउवा र महामन्त्री डा सशांक कोइरालाबीच गोप्य छलफल भएको कुरा सार्वजनिक भएको खुलासा भएको छ ।

भिभान्तामा भएको छलफलमा पदीय भागबण्डा गरिएको कुरा पनि बाहिरिएको छ । स्रोतका अनुसार आउँदो निर्वाचनपछि कांग्रेसको बहुमत आउने आँकलन गर्दै राष्ट्रपति रामचन्द्र पौडेल हुने, प्रधानमन्त्री शेरबहादुर देउवा र सभापति सशांक कोइराला र महामन्त्रीमा आरजु देउवा बनाउने बिषयमा छलफल भएको थियो । सशांकलाई समेत साथमा लिएर देउवाले भिभान्ताको गोप्य भोजमा पद बाँडफाँड गरेको थाहा पाएपछि केन्द्रीय सदस्य डा. शेखर कोइरालाले सभापतिमा उम्मेदवारी घोषणा गरेका छन् । र, बरिष्ठ नेता रामचन्द्र पौडेलले एकपक्षीय रुपमा विभाग गठनदेखि पेल्दै लगेकाले सामूहिक राजीनामा दिने कुरा उठाएका छन् । यद्यपि पौडेल समूहमा लफडैलफडा छ । उक्त समूहमा १४ औं महाधिवेशनमा पार्टी सभापति को बन्ने भन्ने चरम विवाद छ । पौडेल समूहमा सशांक कोइराला, शेखर कोइराला, प्रकाशमान सिंहदेखि अर्जुननरसिंह केसीसम्मले सभापतिमा दाबी गरेका छन् ।    

आरजुको नाम महामन्त्रीमा आएपछि देउवा गुटमै असन्तुष्टी पैदा भएको छ । विशेषगरी उपसभापति विमलेन्द्र निधिले देउवाको यस्तो प्रवृत्तिको बिरोधमा सभापतिमा उम्मेदवारी नै घोषणा गरेका छन् । निधिलाई टक्कर दिन देउवाले विजय गच्छदारलाई उपसभापति मनोनीत त गरिसकेका छन् नै सूर्यबहादुर थापाका पुत्र सुनिल थापालाई भित्र्याएर थप बलियो भएको सन्देश प्रवाह गर्न खोजेका छन् । निधिलाई काउन्टर दिन गोपालमान श्रेष्ठलाई सभापतिमा दाबेदारी प्रस्तुत गर्न लगाइएको छ ।

देउवामाथि जसरी पनि आरजुलाई स्थापित गराउन दबाब बढेको भिभान्ता प्रकरणपछि उजागर भएको छ । आरजुले देउवालाई सभापतिमा सशांकलाई अगाडि बढाएर आफूलाई महामन्त्रीमा उम्मेदवार बनाउन दबाब दिइरहेको स्रोत बताउँछ । देउवा पावरमा भएको बेला आरजु महामन्त्री बन्ने तयारीमा छन् । उनले गिरिजाप्रसाद कोइरालाले सुजातालाई टिपेरै उपप्रधानमन्त्री र परराष्ट्रमन्त्री नै बनाएको उदाहरण पेश गर्दै खुट्टा नकमाउन झक्झक्याइरहेकी छन् ।

उता, १३ औं महाधिवेशनमा सभापतिमा पराजीत भएर पनि पर्याप्त राजनीतिक लाभ लिएका कृष्ण सिटौला भने पर्ख र हेरको रणनीतिमा छन् । सिटौला सभापतिमा देउवाइतर गुटबाट डा. शेखर कोइराला उम्मेदवार भएमा उनीसँग गठजोड गर्ने पक्षमा छन् । त्यसो हुन नसकेमा उनी देउवातिरै ढल्किने जानकारहरुको भनाइ छ ।