सिंहदरबारभित्रकै क्यान्टिनमा म्याद सकिएका खानेकुरा भेटिएपछि सञ्चालकलाई ३ लाख जरिवाना

काठमाडौँ। देशको प्रमुख प्रशासनिक निकाय सिंहदरबार परिसरभित्र रहेको केन्द्रीय चमेनागृह (सेन्ट्रल क्यान्टिन)मा अखाद्य वस्तु फेला परेको छ ।उक्त केन्द्रीय क्यान्टिनमा बाणिज्य, आपूर्ति तथा उपभोक्ता संरक्षण विभागले आकस्मिक अनुगमन गर्दा म्याद सकिएका खानेकुरा भेटिएका हुन् ।

क्यान्टिनमा खानयोग्य अवधि सकिएका र म्याद सकिएका मसला तथा दुग्धजन्य पदार्थ भेटिएको विभागको भनाइ छ।

विभागले आइतबार केन्द्रीय क्यान्टिनमा आकस्मिक अनुगमन गरेको थियो। विभागका बजार निरीक्षण अधिकृत टोलीले अनुगमन गर्दा क्यान्टिनमा दुर्गन्धित मासु र तरकारीसमेत फेला परेको थियो।

खान योग्य नभएका सबै चिजबिज तत्काल नष्ट गरिएको विभागले जनाएको छ।

साथै उक्त क्यान्टिन सञ्चालन गर्ने कञ्चन चमेना गृहका उत्तम भट्टराईलाई उपभोक्ता हित विपरीत कसुर गरेकोले ३ लाख जरिवानासमेत गरिएको विभागले बताएको छ।