कैलालीमा माइक्रो बसको ठक्करबाट पैदलयात्रीको मृत्यु हुँदा पूर्वपश्चिम राजमार्ग अवरुद्ध

काठमाडौं । कैलालीमा माइक्रो बसको ठक्करबाट पैदल यात्रीको ज्यान गएको छ ।

पूर्वपश्चिम राजमार्ग अन्तरगत गोदावरी नगरपालिका–९ बल्मीमा आज बिहीबार बिहान बा ५ ख ४०३२ नम्बरको माइक्रो बसले ठक्कर दिदा पैदल यात्रीको मृत्यु भएको प्रहरीले जनाएको छ ।

जिल्ला ट्राफिक प्रहरी कार्यालयका प्रमुख ट्राफिक प्रहरी निरीक्षक विरेन्द्र जोहारीले माइक्रोको ठक्करबाट गौरीगंगा नगरपालिका–६बस्ने ६० वर्षीया गेरुवा चौधरीको घटनास्थलमै मृत्यु भएको जानकारी दिए ।

नेपालगञ्जबाट अत्तरियातर्फ आउँदै गरेको उक्त माइक्रो बस ले चौधरीलाई ठक्कर दिएको थियो ।

उक्त माइक्रो बस र चालक बाँकेको कोहलपुरका २९ वर्षीय नविन सिंहलाई इलाका प्रहरी कार्यालय मालाखेतीले नियन्त्रणमा लिएको जोहारीले बताए ।

यस घटनाको विरोधमा स्थानीयले पूर्वपश्चिम राजमार्ग अवरुद्ध गरेका छन् । उक्त बन्द सडक खुलाउने प्रयास भइरहेको प्रहरीले जनाएको छ ।