बंगलादेशमा डुंगा दुर्घटना: मृत्यु हुने ५९ पुगे 

काठमाडौं । बंगलादेशको एक नदीमा झन्डै १०० जना (यात्रु) हिन्दु तीर्थयात्रीहरू बोकेको डुंगा पल्टिदा मृत्यु हुने यात्रीको सङ्ख्या ५९ जना पुगेको छ ।

बंगलादेशको राजधानी ढाकाबाट ४६८ किलोमिटर उत्तरतर्फ पर्ने पञ्चगढ जिल्लाको करातोया नदीमा आइतबार दिउँसो डुंगा पल्टिएको थियो ।

उक्त दुर्घटनामा मृत्यु हुनेको सङ्ख्या लगातार बढ्दै गइरहेको ढाका ट्रिब्युनले जनाएको छ । त्यहाँका अधिकारीहरुले सो डुंगा दुर्घटनामा परी हराएका व्यक्तिको शव भेटिने क्रम जारी रहेको बताएकाछन्।

अहिलेसम्म ५५ शवको सनाखत भएको छ भने जिल्ला प्रशासनको सूचना डेस्कका अनुसार अझै कम्तिमा ३५ जना हराइरहेका छन्।

क्षमताभन्दा बढी यात्रुका कारण सो डुंगा दुर्घटनामा परेको प्रहरीले बताएको छ ।