गोसाईकुण्ड सरुवा भएका काठमाडौं महानगरका न्यौपाने खटाएको कार्यालयमा गएनन्, रमाना नबुझे कारबाही हुने

काठमाडौं । बागमती प्रदेश सरकारले रसुवाको गोसाईकुण्ड गाउँपालिकामा सरुवा गरेका काठमाडौं महानगरपालिकाका आठौं तहका कर्मचारी श्याम न्यौपानेले खटाएको कार्यालयमा जान अटेर गर्दैआएका छन् ।

न्यौपानेको २०८३ असोज ५ गते गोसाईकुण्ड गाउँपालिका रसुवामा सरुवा भएको थियो । सो  सरुवा रद्द गराउन र महानगरमै थमौती हुन उनी बिभिन्न शक्तिकेन्द्रमा धाइरहेका छन् । बित्त बिभागमा कार्यरत न्यौपानेले ठेकेदारहरु लगाएर सरुवा रोक्न अहोरात्र लागेको आरोप छ । स्रोतका अनुसार ठेकेदारहरुमार्फत् बागमती प्रदेशका मुख्यमन्त्री किरण थापामगरमार्फत् सरुवा रद्द गराउँछु भन्दै उनी दौडधूपमा लागिरहेका छन् । रमाना बुझेर खटाएको कार्यालयमा जानुपर्ने उनी सरुवा रोकाउन शक्तिकेन्द्रमा दौडधूपमा लागेपछि बित्त बिभागमा अर्काे कर्मचारीले काम गर्न पाएका छैनन् ।

काठमाडौं महानगरपालिकाका लेखाका कर्मचारी न्यौपाने सधैं बित्त  बिभागमा कार्यरत रहन पाउने भाग्यमानी र शक्तिशाली कर्मचारी हुन् । महानगरका अरु लेखाका कर्मचारीको आन्तरिक लेखापरीक्षण, आयोजना, वडाहरुमा सरुवा हुन्छ । तर न्यौपाने भने सधैंजसो बित्त बिभागमै रजगज गर्दैआएका छन् ।

महानगरपालिका १७ वडाका वडाध्यक्ष नवीन मानन्धर र २६ नम्बरका वडाध्यक्ष ख्याम तिवारीका अति निकट मानिन्छन् न्यौपाने । यसभन्दा अघिका महानगर प्रमुख बालेन्द्र शाहले उनको क्रियाकलापबाट आजित भएर सरुवा गर्न खोज्दा मानन्धर र तिवारीले रोकेका थिए ।

पछिल्लो पटक महानगरपालिकाका कार्यबाहक मेयर सुनिता डंगोलले सरुवा गर्न खोज्दा कार्यपालिकाको बोर्डको हवाला दिंदै मानन्धर र तिवारीले रोकेका थिए । मानन्धर र तिवारीको सबै खर्च ब्यवस्थापन पनि न्यौपानेले गर्दैआएकाले उनका अनियमिततामा साथ दिंदैआएको स्रोत बताउँछ ।

पछिल्लो पटक उनले कार्यवाहक मेयर डंगोललाई प्रभावमा पार्नका लागि नेकपा (एमाले)का केन्द्रीय सदस्य अजयक्रान्ति शाक्य र अन्जना शाक्य दम्पत्तिलाई प्रभावमा पार्न सफल भएका छन् । तर उनीहरुलाई समेत सुईको नदिई बागमती प्रदेशको मुख्यमन्त्री तथा मन्त्रिपरिषद कार्यालयबाटै न्यौपानेको सरुवा भएपछि तिवारी र मानन्धर पनि अवाक भएका छन् ।  न्यौपानेका बारेमा धेरै नै गुनासाहरु आएपछि उनको सरुवा भएको बागमती प्रदेश मुख्यमन्त्री कार्यालयका अधिकारी बताउँछन् । रमाना नबुझे कानुन अनुसार कारबाही हुने पनि ती अधिकारी बताउँछन् ।

एमाले सचिव महेश बस्नेतसँग आफ्नो राम्रो सम्बन्ध भएकाले न्यौपाने सरुवा रोक्न लागेका छन् । मुख्यमन्त्रीलाई महेश बस्नेतमार्फत् भनसुन गराउन उनी रातदिन लाग्दा पनि न्यौपानेको आचरणदेखि बिभिन्न गुनासा आएकाले सरुवा रोक्नै नसकिने मुख्यमन्त्री कार्यालय स्रोत बताउँछ ।

असोज ५ गते सरुवा भइसकेपछि पनि बित्त बिभागका श्याम न्यौपानेले प्रशासन प्रमुख महेश काफ्लेसँग मिलेर धमाधम रोकिएका भुक्तानीका चेक काटिरहेको महानगर स्रोत बताउँछ । र, सरुवा भइसकेका कर्मचारीले चेक काटी धमाधम ठेकेदारहरुलाई भुक्तानी दिंदा पनि प्रमुख प्रशासकीय अधिकृत मुक्ति अर्यालले रोक लगाएका छैनन् । महानगरमा सधैं वित्त बिभागमा बसी भुक्तानीमा ठेकेदारहरुसँग पीसी लिन पल्किएका उनी कुनै हालतमा सरुवा रोकाउन साम दाम सबै प्रयोग गरेर लागेका छन् ।

बित्त बिभागमै बर्षौंदेखि कार्यरत न्यौपानेले ठेक्काको भुक्तानीमा कमिसन खाने गरेकाले उनका बिरुद्ध अख्तियारमा समेत धेरै उजुरी परेका र पटक–पटक बयान दिन पनि जाने गरेको स्रोत बताउँछ । दर्जाले आठौं तहमात्र भए पनि न्यौपाने महानगरमा शक्तिको प्रयोग गरी लाभ लिनेमा अग्रपंक्तिमा पर्दछन् । सधैं बित्त बिभागमा कार्यरत रहेका उनले अकूत सम्पत्ति आर्जन गरी काठमाडौं महानगरपालिका कालोपुल, बुढानीलकन्ठलगायतका ४ ठाउँमा घर जोडेको स्रोत बताउँछ ।

स्रोत भन्छ–दैलेख घर भएका उनका काठमाडौंमा ४ वटा घरका अलावा ल्याण्डरोभर गाडीसमेत रहेको छ । काठमाडौंका घरदेखि परिवार र आफन्तका नाममा राखेकाले सम्पत्ति छानबिनको माग गर्दै अख्तियार दुरुपयोग अनुसन्धान आयोगमा समेत उजुरी परेको छ । सुशासनलाई एजेन्डा बनाएर आएको रास्वपाले भ्रष्टाचार गर्ने र ब्यक्तिगत बैभव हासिल गर्नेहरुको बारेमा सम्पत्ति छानबिन आयोग नै बनाएको थियो ।

न्यौपाने भन्छन् :

काठमाडौं महानगरपालिकाको बित्त बिभागमा कार्यरत आठौं तहका श्याम न्यौपानेले भने–‘मेरो सरुवा नै कानुनबिपरीत गरिएको छ । म महालेखा नियन्त्रक कार्यालयको आठौं तहको कर्मचारी हुँ । सातौं तहको दरबन्दीमा सरुवा गरिएको छ । जुन कानुनतः मिल्दैन । काठमाडौंमा मेरा ४ वटा घर देखाउन चुनौती दिन चाहन्छु । एउटा घर छ, घर निर्माण गर्न १ करोड ४० लाख रुपैयाँ बैंकबाट ऋण लिएको छु ।अख्तियारले गतबर्ष नै मेरो सम्पत्ति बिवरण छानबिन गरी हेरेर केही नदेखिएपछि तामेलीमा राखिसकेको छ । मैले कुनै सेवाग्राहीको काम रोकेर एक पैसा लिएको भए पुष्टि गर्न समेत चुनौती दिन्छु । म दराज समेत मेरो कार्यकक्षमा राख्दिनँ । फाइल कुनै पनि अड्किएको गुनासो सेवाग्राहीसँग सोध्न सक्नुहुन्छ ।’

न्यौपानेले भने–‘म इमान्दारीपूर्वक काम गर्ने मान्छे हो, गाडी खरिद गरिएको भनिएको छ । सरकारले नै गाडी दिएको छ भने मलाई अर्को गाडी किन चाहियो ? घर बनाउन नै ऋण लिएको छु । गाडी खरिद कसरी गर्न सक्छु ? फेरि बैंकमा घर निर्माणकै ऋण हुँदाहुँदै गाडीका लागि ऋण बैंकले कसरी दिन्छ ?’ केही रिसईबी हुनेहरुले जे दियो, त्यो प्रकाशित नगरी सत्यतथ्य जाँच गरी समाचार लेख्नुहोला ।’