रास्वपा महाधिवेशन: प्रतिनिधि शुल्क स्वेच्छिक, तिरेकाले पनि फिर्ता लिन पाउने

काठमाडौैं । राष्ट्रिय स्वतन्त्र पार्टी (रास्वपा) का सभापति रवि लामिछानेले महाधिवेशन प्रतिनिधिहरूका लागि तोकिएको पाँच हजार रुपैयाँ शुल्कलाई पूर्ण रूपमा स्वेच्छिक बनाउने घोषणा गरेका छन् ।

चितवनमा जारी पार्टीको प्रथम महाधिवेशनको बन्दसत्रलाई सम्बोधन गर्दै सभापति रवि लामिछानेले कतिपय प्रतिनिधिहरूलाई आर्थिक भार परेको हुनसक्ने महसुस गर्दै यस्तो निर्णय लिएका हुन् ।

उनले यसअघि नै उक्त शुल्क बुझाइसकेका प्रतिनिधिहरूले चाहेमा आफ्नो रकम फिर्ता लिन सक्ने समेत स्पष्ट पारेका छन् । महाधिवेशनका क्रममा प्रतिनिधिहरूले केही दिन दुःख पाउनुपरेको स्वीकार गर्दै उनले आर्थिक कारणले कोही पनि प्रक्रियाबाट बाहिरिनु नपर्ने वातावरण बनाएका हुन् ।

पार्टीभित्र आन्तरिक लोकतन्त्र र विवेकको राजनीतिको वकालत गर्दै लामिछानेले आसन्न नेतृत्व चयनमा कसैको दबाब वा ‘ह्वीप’ स्वीकार्य नहुने चेतावनी दिए ।

देशभरका ५२ लाख नागरिकले विवेक प्रयोग गरेर रास्वपालाई देशको शक्तिशाली दल बनाएको स्मरण गराउँदै सभापति लामिछानेले अब पार्टीको आन्तरिक चुनावमा पनि त्यस्तै उच्च लोकतान्त्रिक विवेक प्रदर्शन गर्नुपर्ने बेला आएको बताए । दल निर्माण र महाधिवेशन व्यवस्थापनका क्रममा केही प्राविधिक र व्यवस्थापकीय चुनौतीहरू आए पनि यसलाई सहज रूपमा लिन उनले आग्रह गरे ।