वीरगन्जका मेयर सिंहसँग अदालतले माग्यो दुई मुद्दामा ४ लाख १५ हजार धरौटी

काठमाडौँ। जिल्ला अदालत पर्साले प्रहरी हिरासतमा रहेका वीरगन्ज महानगरपालिकाका मेयर राजेशमान सिंहसँग ४ लाख १५ हजार धरौटी माग गरेको छ।

जिल्ला न्यायाधीश गायत्रीप्रसाद रेग्मीको एकल इजलासले मंगलबार थुनछेकको बहस सुनिसकेपछि आदेश गर्दै लिखित कीर्तेसम्बन्धी कसुरको मुद्दामा ४ लाख र झुट्टा विवरण पेश गरेको मुद्दामा १५ हजार रुपैयाँ धरौटी माग गरेको हो।

आज पक्राउ परेका उनलाई आजै अदालतमा पेश गरिएको थियो। ‘थुनछेकको बहस हुँदा दुई वटा मुद्दामा कूल ४ लाख १५ हजार धरौटी माग भएको हो’, जिल्ला अदालत पर्साका सूचना अधिकारी जयनारायण यादवले नेपालखबरसँग भने।

हाल प्रहरी हिरासतमा रहेका उनी धरौटी रकम बुझाएपछि थुनामुक्त हुनेछन्।