गिटार बादनमा समीप न्यौपानेको उत्कृष्ट प्रस्तुति, टर्कीमा नेपाललाई चिनाए

काठमाडौं । नेपालका गिटार वादक समिप न्यौपानेले टर्कीमा आयोजित अन्तर्राष्ट्रिय कार्यक्रममा उत्कृष्ट प्रस्तुति दिएका छन् । ‘गोल्डेन किड्स इन्टरनेशनल’ मार्फत् सहभागी भएका न्यौपानेले नेपालीपन झल्किने धुन प्रस्तुत गरेका थिए । आयोजक, निर्णायक र दर्शक सबैले उनको गिटार बादनको प्रशंसा गरेका छन् ।

नेपालकी नेशनल डाइरेक्टर प्रमिला सिलवालको नेतृत्वमा सहभागी भएका न्यौपानेले गिटारमा प्राविधिक दक्षता, आत्मविश्वास र संगीतप्रतिको समर्पण देखाएका थिए । आयोजकहरूले उनलाई ‘भविष्यको अन्तर्राष्ट्रिय कलाकार’ को रुपमा उदाउन सक्ने संभावना देखेका छन् ।

सानै उमेरदेखि संगीतप्रति रुचि राख्ने समिपले निरन्तर अभ्यास र लगनसाथ आफूलाई दक्ष गिटार वादकका रूपमा स्थापित गरेका छन् । परिवारको समर्थन र मार्गदर्शनले उनलाई अन्तर्राष्ट्रियस्तरसम्म पुग्न प्रेरित गरेको बताइएको छ ।

कार्यक्रममा विभिन्न देशका युवा कलाकार सहभागी थिए । प्रतिस्पर्धा कडा भए पनि समिपको प्रस्तुतिले सबैको ध्यान तानेको थियो । उनले नेपाली संगीतको विविधता र भावनालाई गिटारमार्फत् प्रस्तुत गर्दा उपस्थित दर्शक मन्त्रमुग्ध बनेका थिए ।

गिटार बादनमा देशलाई चिनाएका समिपले भने–‘टर्कीमा नेपाललाई प्रतिनिधित्व गर्नु मेरो लागि गर्वको कुरा हो । भविष्यमा अझ धेरै सिकेर नेपाली संगीतलाई विश्वमञ्चमा पुर्याउने मेरो लक्ष्य छ ।’

यस उपलब्धिले नेपालमा बाल प्रतिभा प्रोत्साहनका अभियानमा नयाँ ऊर्जा भरेको छ । विद्यालय, संगीत संस्था र अभिभावकहरू समिपको उदाहरणबाट प्रेरित हुँदै बालबालिकामा लुकेका प्रतिभा पहिचान र विकास गर्न उत्साहित भएका छन् ।

समिप न्यौपानेको यो अन्तर्राष्ट्रिय यात्रा केवल व्यक्तिगत सफलतामात्र नभई नेपाली संगीत र संस्कृतिको प्रतिष्ठासँग जोडिएको गर्वको विषय बनेको छ ।