बीरगञ्जमा हैजा नियन्त्रणका लागि प्रदेश सरकारले सबै संयन्त्र परिचालन गरिसकेको छः स्वास्थ्यमन्त्री सिंह

बीरगञ्ज । प्रदेश सरकारका स्वास्थ्य तथा जनसंख्या मन्त्री सत्रुधनप्रसाद सिंहले बीरगञ्जमा फैलिएको हैजाको महामारी रोकथाम र नियन्त्रणका लागि प्रदेश सरकारले आफ्ना सबै संयन्त्र र निकायलाई परिचालन गरिसकेको बताएका छन् ।

बीरगञ्जमा आइतबार बसेको जिल्ला स्वास्थ्य संकट व्यवस्थापना समितिको बैठकलाई सम्बोधन गर्दै मन्त्री सिंहले हैजा महामारी रोकथाम र नियन्त्रणका लागि प्रदेशको स्वास्थ्य निर्देशनालयका प्रमुख निर्देशक सरोज न्यौपानेको नेतृत्वमा विज्ञसहितको टोली परिचालन गरिसकेको जानकारी गराए ।

स्वास्थ्य महाशाखाको आपूर्ति प्रमुख डा. विपनकुमार झा र जनस्वास्थ्य अधिकृत सन्तोष ठाकुर नेतृत्वको छुट्टै टोली पनि बीरगञ्जमा परिचालन गरिसकिएको उनले बताए ।

मन्त्री सिंहले भने–‘वीरगन्जमा देखिएको यो महामारीप्रति प्रदेश सरकार गम्भीर छ । सबै निकायलाई अलर्ट अवस्थामा राखेका छौं । बिरामीको उपचारमा कुनै पनि कमी वा लापरबाही हुन दिंदैनौं । यसका लागि औषधि, उपकरण र जनशक्ति जे जे चाहिन्छ मधेस सरकार दिन तयार छ । पछि हट्दैन ।’

उक्त बैठकमै प्रदेशको स्वास्थ्य तथा जनसंख्या मन्त्रालयका सचिव डा. ओमप्रसाद अर्यालले नारायणी अस्पतालमा प्रदेशको स्वास्थ्य मन्त्रालयका तर्फबाट केही मात्रामा औषधि उपलब्ध गराइसकेको जानकारी गराए । नारायणी अस्पतालमा आइतबारदेखि प्रदेश सरकारले १० जना मेडिकल अधिकृत चिकित्सक, १० जना पारामेडिकल स्टाफ र केही स्टार्फ नर्स पठाइसकेको उनले बताए ।

प्रदेश सरकारको स्वास्थ्य मन्त्रालयले महामारीको रोकथाम र नियन्त्रणसँगै बिरामीको उपचारका लागि आवश्यकता अनुसार थप औषधि र जनशक्ति उपलब्ध गराउँदै जाने पनि उनले बताएका छन् ।