देशभर टप गर्ने सर्लाहीका सुरज : ग्रामीण भेगबाट राष्ट्रव्यापी प्रेरणाको शिखरमा

सर्लाही । कक्षा १२ को राष्ट्रिय परीक्षा बोर्डद्वारा सार्वजनिक नतिजामा देशभर टप गर्न सफल भएका सुरज अधिकारी अहिले सम्पूर्ण देशभरका विद्यार्थीका लागि प्रेरणाको श्रोत बनेका छन् । विज्ञान संकायमा ३.९६ जिपिए ल्याएर बोर्ड टपर बनेका सुरज सर्लाहीको चक्रघट्टा गाउँपालिका–२ का स्थायी बासिन्दा हुन् ।

२०६४ साल चैत २१ गते काठमाडौँमा जन्मिएका सुरजका बाबु रामपुजन राय र आमा धर्मशिला कुमारी यादव हुन् । हाल उनी ललितपुरको महालक्ष्मी नगरपालिका–७ मा परिवारसँग बस्दै आएका छन् । सुरजले एसईई परीक्षा अक्सिडेन्टल पब्लिक स्कूल, अनामनगरबाट ३.८५ जिपिएसहित उत्तीर्ण गरेका थिए भने प्लस टु अध्ययन लिभरपूल इन्टरनेशनल कलेज, नयाँबानेश्वरबाट गरेका थिए ।

साधारण मध्यम बर्गीय पृष्ठभूमिबाट आएका सुरजको सफलता सहज थिएन । उनले मोबाइल र सामाजिक सञ्जालबाट टाढा रहँदै अध्ययनमा निरन्तरता दिएका थिए । अनुशासन, नियमितता र आत्मविश्वासले नै उनलाई यो उचाइमा पुर्याएको हो ।

‘मैले कहिल्यै अरूसँग प्रतिस्पर्धा गरिनँ, सधैं आफैंसँग गरेँ, सुरज भन्छन् ‘आजको म हिजोको भन्दा राम्रो बन्न सक्छु भन्ने सोच नै मेरो प्रेरणा बन्यो ।’

राजधानी केन्द्रित शिक्षा प्रणालीको मानसिकतालाई तोड्दै ग्रामीण भेग सर्लाहीबाट आएका सुरजको राष्ट्रियस्तरमा देखिएको उत्कृष्टताले शिक्षा क्षेत्रमा नयाँ सन्देश दिएको छ । उनी भविष्यमा चार्टर अकाउन्टेन्ट पढ्न चाहन्छन् र नेपालमै रहेर समाज तथा देशका लागि योगदान गर्न चाहने इच्छा व्यक्त गर्छन् ।

उनको सफलतामा परिवार, कलेज, जिल्ला र सम्पूर्ण देश गौरवान्वित भएको छ । सामाजिक, शैक्षिक र राजनीतिक क्षेत्रका व्यक्तित्वहरूले उनलाई बधाई दिँदै उज्ज्वल भविष्यको कामना गरेका छन् । सुरज अधिकारी अहिले देशभरका लाखौं विद्यार्थीका लागि उज्यालो प्रेरणाको प्रतिक बनेका छन् ।