बिचौलियाको घेराबन्दीमा मन्त्री, सीटीईभीटीको सम्बन्धन खुलाउन करोडौंको खेल

काठमाडौं । प्राविधिक शिक्षा तथा व्यावसायिक तालिम परिषद् (सीटीईभीटी)मा कलेजहरुलाई सम्बन्धन दिने चलखेल भइरहेको छ । एसईईको नतिजा सार्वजनिक भइसके पनि सीटीईभीटीले अन्तर्गतका कलेजहरुमा विद्यार्थीहरुको भर्ना खुलाउन सकेको छैन ।

भर्ना खुलाउनतिर लाग्नुको साटो सीटीईभीटीको नेतृत्व कलेजलाई बेमौसममा सम्बन्धन दिने हतारोमा लागेको छ । कलेजहरुलाई सम्बन्धन दिने क्रममा करोडौं लाभ हुने भएकाले बिचौलियाको प्रलोभनमा परेको सीटीईभीटीको नेतृत्व संचालनमा रहेका कलेजहरुमा बिद्यार्थी भर्ना खुलाउनेतिर गम्भीर रुपमा नलागेको आरोप छ ।

चिकित्सा शिक्षा आयोगले कोटा निर्धारण नगरेकाले एसईई गरेलगत्तै भर्ना प्रक्रिया सुरु हुन सकेको छैन । भर्ना प्रक्रिया अन्यौलमा छ । भइरहेका कलेजको नै भबिष्य के हुने भन्ने अन्योलता कायम रहेको बेलामा बिचौलियाहरु एचए, फार्मेसी, ल्याबलगायत डिप्लोमा तहमा मेडिकल लगायत अध्यापन गराउने कलेजको सम्बन्धन दिने खेलमा लागेका छन् ।

चिकित्सा शिक्षा आयोग र सीटीईभीटीले संयुक्तरुपमा तयार गरेको क्लालेन्डर अनुसार आवश्यकताका आधारमा मापण्ड पूरा गरेका नयाँ कलेजहरुलाई माघ– फागुनमा सम्बन्धन दिनसक्छ । तर कलेजका लागि आवेदन दिएका माफियाहरुको प्रभावमा परी सीटीईभीटी नेतृत्व भर्ना खुलाउनुअघि नयाँ कलेजलाई सम्बन्धन दिने खेलमा लागेको छ ।

एउटा कलेजको सम्बन्धन दिंदा न्यूनतम ५० लाख रुपैयाँसम्मको सेटिङ हुने गरेको छ । ४ सय कलेजको सम्बन्धनमा करोडौैंको सेटिङ भएकाले शिक्षामन्त्री रघुजी पन्तलाई पनि बिचौलियाहरुले चर्कै दबाब दिइरहेको शिक्षा मन्त्रालय स्रोत बताउँछ ।

करोडौंको सेटिङमा बिभिन्न बिषयमा अध्यापन गराउने पाइपलाइनमा रहेका ४ सय कलेजहरुलाई सम्बन्धन दिलाउन बिचौलियाहरु लागेका छन् । बिचौलियाहरु भर्ना खुलाउनुअघि सम्बन्धन लिने र यही बर्षबाट बिद्यार्थी भर्ना गराउने खेलमा मन्त्रीलाई दबाब दिइरहेका छन् । बिचौलियाले चिकित्सा आयोगमा समेत चलखेल गरी सम्बन्धन नदिएससम्म भर्ना समेत खुलाउन नदिएको आरोप छ ।

पचासौं लाख उठाएर बिचौलियाहरु कलेजहरुको सम्बन्धन दिलाउन लागेकोबारेमा शिक्षामन्त्री पन्तले समेत गम्भीरतापूर्वक अध्ययन गर्ने अपेक्षा गरिएको छ । उनले क्यालेन्डर अनुसार नै माघ फागुनमा मात्र सम्बन्धन दिनुपर्ने र अहिले तत्काल एसईई पास बिद्यार्थीहरुलाई सीटीईभीटी मातहतका कलेजमा भर्ना खुलाउनतिर चिकित्सा शिक्षा आयोगमा समेत मन्त्री पन्त लाग्नुपर्ने टड्कारो आवश्यकता देखिन्छ ।