तीनवटा जिल्लाका चेकपोष्टहरू पार गर्दै ८० लाखको चरेश कसरी पुग्यो बीरगंज ?

हेटौंडा । जिल्ला प्रहरी कार्यालय पर्साको टोलीले २०८२ असार ११ गते काठमाडौंबाट बीरगञ्जतर्फ जाँदै गरेको प्रदेश २–०३–००१ ख ६३४८ नम्बरको ट्रकबाट ३ सय १९ केजी लागूऔषध चरेश बरामद गर्यो ।

प्रदेश २–०३–००१ ख ६३४८ नम्बरको ट्रकबाट उक्त चरेश बरामद गरिएको थियो । बीरगञ्ज महानगर–२१ परवानीपुर चोकमा रोकराखेकोे अवस्थामा ट्रक र चालकको खानतलासी गर्दा उक्त चरेश फेलापरेको थियो । उक्त ट्रकचालकले नै धादिङबाट आएको बयान दिएका छन् । पर्सा प्रहरीले बरामद गरेको चरेशको मूल्य प्रतिकेजी २५ देखि ३० हजारसम्म पर्ने प्रहरी स्रोत बताउँछ । ३ सय १९ किलो चरेशको मूल्य २५ हजारकै हिसाबले पनि करिब ८० लाख रुपैयाँ हुन्छ ।

११ भन्दा बढी चेकपोष्ट पार हुँदै चरेश बीरगंज पुग्यो ?

धादिङ हुँदै चरेश चितवन, मकवानपुर र बाराका ११ वटा चेकपोष्ट पार गरी पर्सामा पुग्दा पनि प्रहरीले उक्त चरेश फेलापार्न सकेन । उक्त चरेश प्रहरीको सेटिङमा पर्सा पुगेको आशंकालाई बल पुगेको छ ।

चितवनका मुगलिन, जुगेडी, रामनगर, बसपार्क, गोन्द्राङ, टाँडी, भण्डारा, लोथर पार हुँदा प्रहरीले पत्तो पाउन सकेन । यीमध्ये गोन्द्राङ र जुगेडीमा बढी चेकिङ हुने गर्दछ । यी नाकामा खटिएका प्रहरीले समेत सेटिङमै उक्त चरेश पार गराएको आरोप छ ।

मकवानपुरका मनहरी, सुनाचरी, जिल्ला प्रहरी कार्यालय, पशुपतिनगर, रातमाटे पार हुँदा पनि प्रहरीले थाहा पाउन सकेन । मनहरी र रातमाटेमा कडा चेकिङ गर्दा पनि प्रहरीले चरेश भेट्टाउन सकेन । बाराका अमलेखगंज, पथलैया, परवानीपुर, जितपुर नाका हुँदै उक्त चरेश पर्सा पुगेको थियो ।

यस्तो कडा चेकिङ हुँदा पनि कसरी चरेश पर्सा पुग्यो ? लागूऔषध कारोबारीहरुले उक्त चरेश पर्सा हुँदै भारततर्फ पार गराउन लानेक्रममा पर्सामा बरामद भएको थियो । विगतदेखि नै लागूऔषध कारोबारीहरुले चितवन र मकवानपुरबाट गाँजा, चरेश जस्ता लागूऔषध भारततर्फ लाने गरेका छन् । केही महिनाअघि भारतको पूर्वी चम्पारणमा ठूलो परिमाणमा नेपालबाट गएको गाँजा बरामद भएको थियो ।

यसैबीच, मकवानपुरका बिभिन्न भेगबाट गाँजातस्करी ब्यापक भएको छ । एक हप्ताअघि मात्र चौकीटोल क्षेत्रबाट गाँजा बोकेको डीआई गाडी स्कर्टिङ गरी पार गराएको स्रोत बताउँछ । सहायक हवल्दार उमेश मण्डल र जवान झलक थापाले स्कर्टिङ गरी उक्त गाडी पार गराएको स्रोत बताउँछ ।

मण्डल र थापालाई जिल्ला प्रहरी कार्यालय मकवानपुरका एसपी विश्वराज खड्काले घुमुवाका रुपमा परिचालन गरेका छन् । कारबाहीस्वरुप सरुवा गरिएका मण्डललाई एसपी खड्काले पुनः घुमुवाका रुपमा सादा पोशाकमा खटाएका छन् । प्रहरी चौकी टोलका असई केदार विकले समेत सेटिङमा गाँजा लोड भएका गाडी छाड्ने गरेको आरोप छ ।