समाचारप्रति सशस्त्र प्रहरी पशुपतिनाथ बेशका प्रमुख खड्काको आपत्ति

नेपालफेस डटकममा २०८१ असार १३ गतेका दिन प्रकाशित ‘भेटी चोर्ने जेल पुगे, भारतीय सँग असुल्ने सशस्त्रका घुमुवालाई कसले रोक्ने ?’ शीर्षकमा प्रकाशित समाचारप्रति सशस्त्र प्रहरी बल,नेपाल मन्दिर सुरक्षा बेश पशुपतिनाथ, काठमाडौंका प्रमुख दिपेन्द्र खड्काले आपत्ति जनाएका छन् ।

२०८१ असार १६ गते नेपालफेसलाई प्राप्त खण्डनमा उल्लेख छ–‘नेपाल फेस डटकममा २०८१ असार १३ गतेका दिन प्रकाशित ‘भेटी चोर्ने जेल पुगे, भारतीय सँग असुल्ने सशस्त्रका घुमुवालाई कसले रोक्ने ? शीर्षकमा प्रकाशित समाचारप्रति हाम्रो गम्भीर ध्यानाकर्षण भएको छ । शीर्षकमा प्रकाशित समाचारप्रति हाम्रो गम्भीर ध्यानाकर्षण भएको छ ।

समाचारमा ४ जना सशस्त्रका जवान र हवल्दारलाई घुमुवाको रुपमा खटाई भारतीय पर्यटकहरुलाई मन्दिर दर्शन गराउन सहजीकरण गर्ने भनेर सिधै बेश इन्चार्जकोमा लाने गरेको र मन्दिर दर्शन गराउनका लागि ३ हजार ५ सय देखि ५ हजार रुपैयाँसम्म असुल्ने गरेको जस्ता अत्यन्त निराधार, झुटो, तथ्यहीन, भ्रामक अनि कपोकल्पित समाचार प्रकाशन भएको छ ।

राष्ट्रको सेवामा समर्पण भावले खटिंदै आएको म तथा मेरा मातहतका सुरक्षाकर्मीहरुको चरित्रहत्या गर्ने दुरासय मनसायले प्रकाशित झुटो समाचारले हामीलाई अत्यन्त मर्माहत बनाएको छ । गम्भीर आक्षेप लगाएर यस्तो समाचार लेख्दा मसँग प्रतिक्रियासमेत नलिई एकतर्फीरुपमा लेखी पत्रकारिताको सामान्य सिद्धान्त बिपरीत पनि हो । तसर्थ उक्त झुटो समाचारको खण्डन गरिदिनु हुन आग्रह गर्दछु ।’