एमाले सचिवालयको निर्णयः इलाम २ मा सुहाङलाई उम्मेदवार बनाउने

काठमाडौं । नेकपा (एमाले)को सचिवालय बैठकले इलाम क्षेत्र नम्बर २ मा आगामी वैशाख १५ गते हुने उपनिर्वाचनमा सुहाङ नेम्वाङलाई उम्मेदवार बनाउने निर्णय गरेको छ ।

आइतबार एमाले मुख्यालय च्यासलमा बसेको सचिवालय बैठकले नेम्वाङलाई उम्मेदवार बनाउने निर्णय गरेको हो ।

सचिवालय बैकठले एमालेका उम्मेदवारलाई विजयी गराउन सम्पूर्ण शक्ति केन्द्रित गर्ने निर्णय गरेको छ ।

सुहाङ २०७९ मंसिर ४ मा भएको आमनिर्वाचनमा त्यसै क्षेत्रबाट जितेका एमाले नेता सुवासचन्द्र नेम्वाङका छोरा हुन् ।

सुवास नेम्वाङको गएको भदौ २५ गते निधन भएपछि त्यहाँ उपनिर्वाचन हुन लागेको हो ।

यसअघि इलाम जिल्ला कमिटी र प्रदेश कमिटीले इलाम–२ का लागि सुहाङसँगै नेताहरु बुद्धि खनाल, रवीन्द्र सुवेदी, नरेन्द्रनाथ भट्टराई, देवी क्षेत्री दुलाल र रिम्पल राईलाई सिफारिस गरेको थियो ।

यस्तै एमाले सचिवालय बैठकले प्रदेश सभा अन्तर्गत बझाङ १ बाट दामनबाहदुर भण्डारीलाई उम्मेदवार बनाउने निर्णय गरेको छ ।