प्यालेष्टाइनमा इजरायलले गरेको नरसंहारकारी हमला सह्य हुन सक्दैनः मुस्लिम इत्तेहाद संगठन

काठमाडौं । मुस्लिम इत्तेहाद संगठन नेपालले इजरायल–प्यालेस्टाइन द्वन्द्व चरम उत्कर्षतर्फ अघि बढिरहेकोमा चिन्ता प्रकट गरेको छ । इजरायल–प्यालेस्टाइन द्वन्द्व चरम उत्कर्षतर्फ अघि बढिरहँदा सिंगो विश्व सशंकित बनेको छ र दुई ध्रुवमा विभाजित बन्दै गएको छ ।

संगठनका अध्यक्ष ताज मोहम्मद मियाँले बिहीबार जारी गरेको विज्ञप्तिमा उल्लेख छ–‘इजरायल–प्यालेष्टाइन चरम द्वन्द्वका कारण हजारौं नागरिकको हत्या भएको, हजारौंकै संख्यामा घाइते हुनुपरेको र लाखौं मानिस बेघरबार बन्नुपरेको कारुणिक अवस्था विद्यमान छ ।

यसैक्रममा इजरायलले युद्धको घोषणा गरी प्यालेस्टाइनको भूमिमा रहेका अस्पताल तथा मानव बस्तीमा आततायी ढंगबाट रकेट आक्रमण गरी ५ सय भन्दा बढी निहत्था नागरिकको एकै दिन एकै स्थानमा हत्या गरेको घटना सार्वजनिक भएको छ । मानवीय सेवा गर्ने एक महत्वपूर्ण स्थान हो, अस्पताल ।

अस्पतालमै आक्रमण गरी अबोध बालबालिका, निर्दोष नागरिक र सेवामा खटिएका स्वास्थ्यकर्मीको नरसंहार गरिनु मानवअधिकारको गम्भीर उलंघन र अक्षम्य अपराध भएको हाम्रो ठहर छ । मुस्लिम इत्तेहाद संगठन नेपाल यस घटनाको घोर भत्र्सना गर्दै नेपाल सरकार तथा राष्ट्र संघ समक्ष यस कार्यको भत्र्सना गर्न जोडदार माग गर्दछ ।

यसरी प्यालेस्टाइनमा साम्राज्यवादको पक्षपोषणबाट सिर्जित गम्भीर मानवीय संकट र आमनागरिकको नरसंहार गर्ने इजरायली हमला कुनै पनि कोणबाट सह्य हुन सक्दैन । तसर्थ, यो भीषण संकटको तत्काल समाधानका लागि सन १९४७ मा राष्ट्रसंघ समक्ष गरिएको द्विपक्षीय सम्झौताको अक्षरशः कार्यान्वयन गर्दै संवादबाट शान्ति स्थापना गर्न सम्बद्ध सबै पक्षसँग हाम्रो संगठन जोडदार माग गर्दछ ।

साथै यस घटनामा परी ज्यान गुमाउने, अंगभंग हुने र वेपत्ता पारिएका नागरिकबारे सत्य तथ्य पत्ता लगाई मानवीय सहायता उपलब्ध गराउन र द्वन्द्वबाट उत्पन्न मानवीय संकट समाधानमा केन्द्रित बन्न शान्तिका पक्षधर अन्तर्राष्ट्रिय संघ संस्था समक्ष हार्दिक अपील गर्दछौं ।’

हेर्नुहोस् विज्ञप्ति