२०८२ मंसिरभित्र महाधिवेशन हुने गगन थापाको दाबी

काठमाडौं । नेपाली कांग्रेसका महामन्त्री गगन थापाले पार्टीको १५ औं महाधिवेशन २०८२ मंसिरभित्र हुने दाबी गरेका छन् । पोखरामा आयोजित एक कार्यक्रमलाई सम्बोधन गर्दै क्रियाशील सदस्यताको विषयलाई टुंग्याएर समयमै महाधिवेशन गर्ने बताएका हुन् ।

उनले भने, ‘१५ औं महाधिवेशन २०८२ मंसिरभन्दा पर जाँदैन । जान दिनु हुँदैन । क्रियाशिल सदस्यताको कुरा हामी सबै मिलेर टुंग्याउनुपर्छ । बैशाख १ बाट क्रियाशिल सदस्यबारे छलफल थाल्छौं ।’

चार वर्षभित्र महाधिवेशन हुँदा २०८३ सालमा सबै तहका सम्मेलन गर्न सकिने उनले बताए । तहगत सम्मेलनबाट तल्लो तहका संरचनाले निर्वाचनका लागि आफैं उम्मेदवार छान्न सकिने महामन्त्री थापाले बताए ।

टिकट वितरण गर्ने अधिकार क्रियाशील सदस्यलाई नहुँदा पार्टीमा गुटको राजनीति हुने गरेको उनको भनाइ छ ।