झापामा मोटरसाइकल दुर्घटना : एक किशोरीको मृत्यु, ३ जना घाइते

झापा। झापाको कनकाई पुलमा दुई वटा मोटरसाइकल एकापसका ठोक्किँएको छ। उक्त दुई वटा मोटरसाइकल एकापसका ठोक्किँदा एक किशोरीको मृत्यु भएको छ। दुर्घटनामा बाह्रदशी गाउँपालिका- ५ निवासी १८ वर्षीया जेसिका सिग्देलको मृत्यु भएको जिल्ला प्रहरी कार्यालय झापाका डीएसपी खगेन्द्रप्रसाद रिजालले जानकारी दिए ।

शिवसताक्षी नगरपालिका- १० स्थित कनकाई पुलमा बुधबार साँझ ७ बजे मे ३ प ५४६३ नम्बरको मोटरसाइकलले साइकल यात्रीलाई ठक्कर दिई विपरीत दिशाबाट आइरहेको को ३१ प ९५२९ नम्बरको मोटरसाइकलसँग ठोक्किँदा दुर्घटना भएको हो।

दुर्घटनामा परी मे ३ प ५४६३ नम्बरको मोटरसाइकल चालक भद्रपुर नगरपालिका- ९ निवासी ४० वर्षीया रुद्रप्रसाद न्यौपानेको हात, ढाडमा चोट लागेको र सोही मोटरसाइकल पछाडि सवार जेसिका सिग्देलको दाहिने कानबाट रगत बग्दा गम्भीर घाइते भएका थिए । घाइते दुवै जनालाई बिर्तासिटी अस्पताल बिर्तामोड लगिएको र जेसिकाको सोही अस्पतालमा उपचारको क्रममा राती सवा ८ बजे मृत्यु भएको डीएसपी रिजालले बताए ।

त्यस्तै को ३१ प ९५२९ नम्बरको मोटरसाइकल चालक दमक नगरपालिका-१ निवासी ४० वर्षीय सुरेश राई र सोही मोटरसाइकल पछाडि इलाम जिल्ला चुलाचुली नगरपालिका- ४ निवासी २९ वर्षीय निश्चल चेमजोङ घाइते भएका थिए । घाइते दुवै जनाको टाउको, हातखुट्टामा चोट लागेको र उनीहरूको बीएण्डसी अस्पताल बिर्तामोडमा उपचार भइरहेको छ ।

साइकल यात्री अर्जुनधारा नगरपालिका- ५ निवासी ६३ वर्षीय गङ्गा तामाङको दायाँ खुट्टामा सामान्य चोट लागेको र स्थानीय मेडिकलमा उपचार गरी घर फर्किसकेको प्रहरीले जनाएको छ ।

यता दुर्घटनामा परेका दुवै मोटरसाइकललाई अस्थायी प्रहरी चौकी माईधारले नियन्त्रणमा लिएको छ ।