‘प्रचण्ड’ नेतृत्वको सरकार छाड्ने उपेन्द्रको धम्की, किन गरे मध्यरातमा ओलीसँग भेट ?

काठमाडाैं। जनता समाजवादी पार्टी (जसपा)ले अहिले भन्दा १७ वर्षअघि रौतहटको गौरमा भएको हत्याकाण्ड छानबिन सम्बन्धमा सरकारले गरेको नयाँ सहमतिलाई लिएर असन्तुष्टि जनाएको छ ।

उसले उक्त सहमतिलाई लिएर चरम असन्तुष्टि जनाउँदै पुष्पकमल दाहाल ‘प्रचण्ड’ नेतृत्वको वर्तमान सरकार नै छाड्नेसम्मको चेतावनी समेत दिएको छ ।

सरकार र गौर हत्याकाण्डपीडितबीच सहमति भएलगत्तै जसपा अध्यक्ष उपेन्द्र यादवले सत्ता र प्रतिपक्षी दलका नेतासँग भेटवार्ता बढाएका छन् ।

सरकारले गौर हत्याकाण्डपीडितसँग सहमति गरेलगत्तै उपेन्द्रले कांग्रेस सभापति शेरबहादुर देउवासँग मंगलवार सिंहदरबारमा भेटेर सरकार छाड्ने चेतावनी दिएका थिए ।

‘नक्कली भुटानी शरणार्थी प्रकरणमा सरकारले तपाईंमाथि अन्याय गर्‍यो, बालकृष्ण खाँणलगायतका नेतालाई पक्राउ गरायो । अहिले मलाई अप्ठ्यारो पार्न खोज्दैछ,’ देउवासँगको भेटमा उपेन्द्रको भनाइ उद्धृत गर्दै जसपा उच्च स्रोतले भन्यो ।

देउवाले भने प्रधानमन्त्री प्रचण्डसँग कुरा गर्ने भन्दै तत्काल सरकार छाड्ने निर्णय नगर्न आग्रह गरेका थिए ।

उपेन्द्रले प्रचण्डसँग समेत असन्तुष्टि व्यक्त गरिसकेको स्रोतका दाबी छ । साथै उनले मंगलवार राति प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग पनि भेटेका छन् ।

बालकोटस्थित ओलीको निवासमा भएको भेटमा उपेन्द्रले सरकार छाड्ने मनस्थितिमा पुगेको भन्दै नयाँ सरकारको सम्भावनाबारे समेत कुराकानी गरेको स्रोतको दाबी छ ।

जवाफमा ओलीले नयाँ सरकारका लागि जसपा मात्र आउँदा नपुग्ने बताएका थिए ।

‘तपाईंले छाडेर मात्र सत्ता परिवर्तन हुँदैन होला, तैपनि तपाईंको कदममा मेरो समर्थन रहन्छ भन्ने ओलीको भनाइ थियो,’ उपेन्द्रनिकट स्रोतले भन्यो ।

२०६३ सालमा रौतहटको गौरमा माओवादीले आयोजना गरेको सभामा भएको आक्रमणमा २७ जना माओवादी कार्यकर्ताको मृत्यु भएको थियो ।

सो घटनाका पीडितले हत्याकाण्डमा उपेन्द्र यादवको संलग्नता रहेको बताउँदै आएका छन् ।

गौर हत्यकाण्डपीडित संघर्ष समितिका सदस्यहरूले प्रधानमन्त्री प्रचण्डसँग समेत भेटवार्ता गरेका थिए ।

सरकारले मंगलवार गौर हत्याकाण्डपीडित संघर्ष समितिसँग ५ बुँदे सहमति गर्दै उक्त घटनाको छानबिन गरी दोषीलाई कानूनबमोजिम कारवाही गर्ने जनाएको थियो ।

हेर्नुहोस्, सहमति पत्र :