‘लिगल टीम’ को निर्णय- सन्दीप लामिछानेलाई दक्षिण अफ्रिका नपठाउने

काठमाडौं । क्रिकेटर सन्दीप लामिछानेविरुद्धको मुद्दामा आज हुने भनिएको सुनुवाई रोकिएकाले विश्वकप छनोट अघि दक्षिण अफ्रिकामा हुने अभ्यास खेलमा उनलाई सहभागी नगराउने निर्णय लिगल टीमले गरेको छ ।

बलात्कार अभियोगमा एक किशोरीले सन्दीपविरुद्ध दायर गरेको मुद्दामा आज काठमाडौँ जिल्ला अदालतमा अन्तिम सुनुवाई तोकिएको थियो। तर, उक्त आज सुनुवाई नहुने भएको हो ।

सन्दीपको मुद्दा सुनुवाइमा ढिलाई भएका कारण उनी नजाने निर्णय भएको सन्दीपका कानून व्यवसायी सरोज घिमिरेले जानकारी दिए ।

‘मुद्दाको टुंगो नलगाई उनी नजाने हाम्रो लिगल टीमको निर्णय भयो । जिम्बावे भ्रमणबारे अझै केही निर्णय भइसकेको छैन’, घिमिरेले भने ।

नेपालले जिम्बावेमा विश्वकप छनोट खेल्दै छ । सन्दीपविरुद्ध लागेको बलात्कारको आरोपको फैसला सुनुवाई विभिन्न बहानामा सर्दै आएको छ ।

उक्त प्रकरणमा किशोरीले क्षतिपूर्ति दिन माग गर्दै दायर गरेको निवेदनसमेत साथै राखी पेश गर्न अदालतका न्यायाधीशले आदेश दिने भएका छन् ।