जनवरीमा कुराकानी भएको अडियो अहिले सार्वजनिक गर्नु सुनियोजित : ढाकाकुमार

काठमाडौं । राष्ट्रिय स्वतन्त्र पार्टीका सांसद डा.ढाकाकुमार श्रेष्ठले आफूलाई सुनयोजित रुपमा फसाउन खोजेको दाबी गरेका छन्। आज पार्टी कार्यालयमा पत्रकारहरुसँग कुरा गर्दै उनले अडियो इडिट गरेर फसाउन खोजेको दाबी गरेका हुन् ।

व्यवसायी दुर्गा प्रसाईंसँग दुई करोड डिल गरेको अडियो सत्य नभएको उल्लेख गर्दै उनले आफू हिजोबाटै न्यायालयमा गइसकेकाले क्लिन चिट लिएर आउने बताएका छन् ।

चुनावको मुखमा उक्त अडियो सार्वजनिक हुनु पार्टीविरूद्धको षडयन्त्र भएको उनले बताए । जनवरीमा कुराकानी भएको अडियो अहिले ल्याएर हाल्नु सुनियोजित भएको भन्दै उनले रास्वपालाई चारैतिरबाट प्रहार गर्न खोजिएको आरोप समेत लगाए ।

‘जनवरीमा कुराकानी भएको अडियो अहिले ल्याएर हाल्नु सुनियोजित हो, यो हाम्रो पार्टीलाई चारैतिरबाट प्रहार गर्न खोजेको हो। तीन वटै निर्वाचन क्षेत्रमा हराउन खोजेको हो,’ उनले भने,‘यो एउटा सुनियोजित योजना हो।’