६० लाख भन्दा बढीका भन्सारछलीका हार्डवेयर तथा लत्ताकपडाहरू बोकेको ट्रक प्रहरी नियन्त्रणमा

बीरगंज । वीरगञ्जबाट चितवनतर्फ लैजाँदै गरेको बिलविजक भन्दा बढी विभिन्न किसिमका खुद्रा, हार्डवेयर तथा लत्ताकपडाहरू बोकेको ट्रक प्रहरीले आइतबार नियन्त्रणमा लिएको छ ।

जिल्ला प्रहरी कार्यालय पर्साबाट खटिएको टोलीले वीरगञ्ज महानगरपालिका वडा नं १३ पावरहाउस चोकस्थित सडकखण्डबाट ना २ ख ९३८९ नम्बरको ट्रकलाई नियन्त्रणमा लिएको थियो ।

उक्त मालवाहक ट्रकभित्र लोड रहेका खुद्रा, हार्डवेयर तथा लत्ताकपडाहरू अन्दाजी ६० लाख ३८ हजार १ सय ८८ रुपैयाँ बराबरका मालबस्तुहरू रहेको जिल्ला प्रहरी कार्यालय पर्साका प्रवक्ता डीएसपी दीपक गिरीले जारी गरेको विज्ञप्तिमा उल्लेख छ ।

प्रहरीका अनुसार बरामद ट्रक थप अनुसन्धान तथा आवश्यक कारवाहीका लागि सोमबार राजस्व अनुसन्धान कार्यालय पथलैया, बारामा बुझाइएको छ ।