विश्वकप लिग-२: स्कटल्यान्डसँग नामिबिया पराजित

काठमाडौँ। आईसीसी विश्वकप लिग २ अन्तर्गत नेपालमा जारी क्रिकोणात्मक सिरिजमा स्कटल्यान्डले नामिबियालाई पराजित गरेको छ । आज सोमबार भएको खेलमा स्टकल्यान्डले नामिबियालाई ४३ रनले हराएको हो । त्रिवि क्रिकेट मैदानमा स्कटल्यान्डले दिएको २२२ रनको लक्ष्य पछ्याएको नामिबियाले ३८ ओभर ४ बलमा सम्पूर्ण विकेट गुमाउँदै मात्र १७८ रन बनायो ।

नामिबियाका लागि लोहार्ड लोहारेन्सले ५२ रनको अर्धशतकीय पारी खेले । त्यस्तै कप्तान ग्रेहार्ड इरास्मसले ४३ रन बनाउँदा जेन ग्रिनले २५ रनको योगदान गरे ।

नामिबियाका रुबेन ट्रम्पलम्यान र शन फुचेले समान १०/१० रन बनाए स्कटल्याण्डका लागि मार्क वाटले चार विकेट लिए । त्यस्तै माईकल लिस्कले तीन विकेट लिँदा ब्राण्डन म्याकमुलानले दुई विकेटको योगदान गरे ।

यसअघि टस हारेर पहिले ब्याटिङ गरेको स्टकल्यान्डले ४८ ओभर ४ बलमा अल आउट हुँदै २२१ रन बनाएको थियो । स्कटल्यान्डका लागि क्रिटोफर म्याकब्रिडले सर्वाधिक ४७ रनको योगदान गरे ।

त्यस्तै टमस म्याकिन्टोसले ३४ बनाउँदा कप्तान रिचि बेरिङ्टनले ३२ जोडे । नामिबियाका लागि रुबेन ट्रम्पेलम्यानले सर्वाधिक पाँच विकेट लिए । उनले ९ ओभर ४ बल बलिङ गर्दै ३० रन खर्चिएर ५ विकेट लिए । ट्याङ्नी लुङ्मिनीले २ विकेट लिए ।

यसैगरी जितसँगै विश्वकप लिग टू मा स्कटल्याण्ड ३५ खेलमा २३ मा जित र ९ मा हारका साथ ५० अंकका साथ शीर्ष स्थानमा छ । नामिबिया ३४ खेलमा १८ मा जित र १४ मा हारका साथ ३७ अंकका साथ तेस्रो स्थानमा छ ।