प्रचण्ड भन्छन्- बालेन र हर्कलाई जिताएर जनताले हामीलाई सबक सिकाए

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले स्वतन्त्र उम्मेदवार बालेन शाह र हर्क साम्पाङलाई जिताएर मतदाताले आफूहरूलाई सबक सिकाएको बताएका छन्। 

पार्टीका स्थानीय जनप्रतिनिधिहरुको अभिमुखीकरण कार्यक्रममा प्रचण्डले काठमाडौं महानगर र धरान उपमहानगरको मेयरमा स्वतन्त्र उम्मेदवारलाई जिताएर मतदाताले आफूहरूलाई सबक सिकाएको बताएका हुन् । 

आफूहरूले उठाउँदै आएका विषयलाई बालेन र हर्कले अघि सारेर चुनाव जितेको भन्दै उनले भने, ‘हामीले राम्रासँग काम गरेको नदेखेपछि जनताले हामीलाई सबक सिकाएको जस्तो लाग्छ ।’ 

‘माओवादीले जनताको सेवा गर्ने, धारा, पानी फोहोर मैला व्यवस्थापन, शोषण, विभेद अन्याय अत्याचार सिध्याउँछौं भनेर हामी भनेको होइन?,’ उनले भने। यद्यपि अब स्वतन्त्र उम्मेदवारहरुले नै देशभर जित्छन् भन्ने नभएको उनले बताए ।