सुर्खेतबाट साढे १२ लाख नगदसहित ५५ जना जुवाडे पक्राउ

काठमाडौँ । जुवा खेल्ने तथा सट्टाबाजी गर्ने गरेको आरोपमा सुर्खेत प्रहरीले ५५ जनालाई पक्राउ गरेको छ। जिल्ला प्रहरी कार्यालय सुर्खेतले वीरेन्द्रनगर नगरपालिकाका विभिन्न वडामा जुवा खेलिरहेको भन्ने गोप्य सूचनाका आधारमा छापा मारेर उनीहरूलाई पक्राउ गरेको हो।

जिल्ला प्रहरी कार्यालय सुर्खेतका अनुसार कात्तिक २२ गते राति वीरेन्द्रनगरका विभिन्न स्थानमा हारजित हुने गरी नगद रकम राखेर जुवा खेलिरहेको सूचनापछि कर्णाली प्रदेश प्रहरी कार्यालय, जिल्ला प्रहरी कार्यालय सुर्खेत र मातहतका प्रहरी कार्यालयबाट खटिएको संयुक्त टोलीले खानतलासी गरेको थियो।

प्रहरीले उनीहरूको साथबाट नेपाली रुपैयाँ १२ लाख ३२ हजार ८४५ र भारतीय रुपैयाँ १३ हजार १२५ बरामद गरेको छ। भारतीय रुपैयाँलाई नेपालीमा रूपान्तरण गर्दा २१ हजार रुपैयाँ हुने प्रहरीले जनाएको छ। यसरी कुल १२ लाख ५३ हजार ८४५ रुपैयाँ बरामद भएको छ

त्यस्तै, जुवा खेल्न प्रयोग गरिएका ५२ पत्तीका ५३ गड्डी ताससमेत बरामद गरिएको छ।

प्रहरीले पक्राउ परेका व्यक्तिहरूको नाम, ठेगाना र उमेरसहितको विवरण सार्वजनिक गरेको छ। पक्राउ पर्नेहरू सुर्खेतसहित दैलेख, जुम्ला, बर्दिया, कैलाली, अर्घाखाँची र भारतका विभिन्न स्थानका बासिन्दा रहेका छन्।