प्रस्तावित न्यायाधीशविरुद्ध १३ उजुरी, उजुरीकर्तासँग छलफल जारी

काठमाडौँ। प्रतिनिधिसभाअन्तर्गत संसदीय सुनुवाइ समिति जारी छ। सिंहदरबारस्थित सार्वजनिक लेखा समितिको सभाकक्षमा बैठक जारी छ। बैठकमा सर्वोच्च अदालतका प्रस्तावित न्यायाधीशविरुद्ध उजुरी दिने उजुरीकर्ताहरूसँग छलफल भइरहेको छ।

बैठकमा प्रस्तावित न्यायाधीश डा.रत्नबहादुर बागचन्द र चन्दरबहादुर सारु उपस्थित छन्।

यसअघि समितिको बिहीबारको बैठकमा प्रस्तावित न्यायाधीहरू बागचन,सारु,जनकबहादुर पाण्डे र गोकर्ण डाँगीविरुद्ध परेका उजुरीहरू खोलिएका थिए। ती उजुरी अध्ययनका लागि समितिका सदस्यहरूलाई वितरण गरिएको थियो।

प्रस्तावित न्यायाधीशविरुद्ध १३ वटा उजुरी परेका छन्।

गत असोज २० गते न्यायपरिषद्ले सर्वोच्च अदालतका लागि चार न्यायाधीशको नाम सिफारिस गरेको थियो। संसदीय सुनुवाइ समितिले नाम अनुमोदन गरेपछि राष्ट्रपतिले उनीहरूलाई नियुक्त गर्ने संवैधानिक व्यवस्था छ।