त्रिपुरेश्वरमा बस आगलागी घटना: चालक अर्जुन दोङ भएको पुष्टि, दुई श्रीमती सडकमा उत्रिए

काठमाडौं । हिजो त्रिपुरेश्वरमा ऋद्दिसिद्दिको बसभित्रै आत्मदाह गर्ने युवक अर्जुन दोङ भएको खुलेको छ । यसअघि प्रहरीले उनी दावा लामा भएको बताए पनि वास्तविक पहिचान अहिले खुलेको हो ।

मृतक दोङ मकवानपुरको इन्द्रसरोवर गाउँपालिका वडा नम्बर ३ का हुन् । करिब २२ वर्षीय दोङका दुई श्रीमती र एक छोरा रहेको पनि पुष्टि भएको छ । उनको उपचारका क्रममा कीर्तिपुरस्थित बर्न अस्पतालमा राति निधन भएको प्रहरीले बताएको छ ।

अर्जुनले आत्मदाह गरेको खबरपछि परिवारका सदस्यहरु काठमाडौं आएका छन् । अर्जुनका बाबु छैनन् भने सात जना दाजुभाइमा उनी कान्छा हुन् । सातमध्ये एक दाइ विदेशमा छन् । दुवै श्रीमती र छोरासहित परिवारका सदस्यहरु अहिले किर्तिपुर बर्न अस्पतालमा आएका छन् ।

अस्पताल अगाडि सडकमा अहिले अर्जुनको न्‍याय माग्दै प्रदर्शन भइरहेको छ । अर्जुनका परिवार, आफन्त तथा यातायात व्यवसायी प्रदर्शनमा संलग्न छ । अर्जुनको शव निकालिएको छैन ।