राहत सामग्री आफैँले राखेको भन्ने अफवाहप्रति नेपाल प्रहरीको गम्भीर आपत्ति

काठमाडौँ । नेपाल प्रहरीले विपद्का बेला राहत सामग्री सुरक्षाकर्मीले आफैँले लिएको, वितरण नगरेको वा सामग्री सड्न दिएको भन्ने आशयका सामाजिक सञ्जालमा फैलाइएका सूचना भ्रामक र तथ्यहीन रहेको जनाएको छ।

नेपाल प्रहरीका केन्द्रीय प्रहरी प्रवक्ता प्रहरी नायब महानिरीक्षक अवि नारायण काफ्लेले प्रेस विज्ञप्ति जारी गर्दै नेपाल प्रहरीलगायत अन्य सुरक्षा निकायलाई लक्षित गरी यस्ता अफवाह फैलाइएको विषयमा गम्भीर ध्यानाकर्षण भएको बताएका छन्।

हालै भोटेकोशी र त्रिशूली नदीमा आएको विनाशकारी बाढीबाट रसुवा, नुवाकोट, धादिङलगायत जिल्लामा जनधनको क्षति भएपछि नेपाली सेना, नेपाल प्रहरी र सशस्त्र प्रहरी बल नेपाललगायतका सुरक्षाकर्मी खोज, उद्धार, राहत तथा पुनस्स्थापनाको कार्यमा निरन्तर खटिइरहेको विज्ञप्तिमा उल्लेख छ।

कठिन परिस्थितिमा सुरक्षाकर्मीले आफ्नो ज्यानको समेत प्रवाह नगरी विपद्मा परेका नागरिकको उद्धार, बेपत्ता व्यक्तिको खोजी, घाइतेको उपचार, फेला परेका शवको व्यवस्थापन तथा राहत सामग्री वितरणलगायत मानवीय कार्यमा भूमिका निर्वाह गरिरहेको प्रहरीले जनाएको छ।

नेपाल प्रहरीसँग राहत सामग्री भण्डारणमा रहेको भन्ने दाबीसमेत असत्य रहेको स्पष्ट गर्दै प्रहरीले विपद्का बेला उद्धार तथा राहतमा खटिएका राष्ट्रिय सुरक्षाकर्मीको मनोबलमा असर पर्ने गरी अफवाह फैलाउनु गैर जिम्मेवार कार्य भएको जनाएको छ।

यस्ता कपोलकल्पित आरोप र भ्रामक सूचना प्रसार हुँदा आम नागरिकमा सुरक्षा निकायप्रति अविश्वास सिर्जना हुन सक्ने तथा विपद् व्यवस्थापनसम्बन्धी संवेदनशील कार्यसमेत प्रभावित हुन सक्ने प्रहरीको भनाइ छ।

नेपाल प्रहरीलगायतका सुरक्षाकर्मी विपद्का समयमा नागरिकको जीवन रक्षा, खोज तथा उद्धार तथा मानवीय सेवामा निरन्तर प्रतिबद्ध रहेको उल्लेख गर्दै प्रहरीले राष्ट्रिय सुरक्षाकर्मीको मनोबल कमजोर पार्ने र नागरिकमा भ्रम सिर्जना गर्ने किसिमका अफवाह तथा अपुष्ट सूचनाको प्रचारप्रसार नगर्न सबैसँग आग्रह गरेको छ।