सेटिङका आधारमा बाँडिएका भेल्पा–हात्तीवनका जग्गामाथि चल्यो डोजर, यी हुन् सेटिङमा बाँड्ने आयोजना प्रमुखहरू

ललितपुर । ललितपुरको भेल्पा हात्तीवन जग्गा एकीकरण आयोजनामा पूर्व आयोजना प्रमुखहरुले व्यापक अनियमितता गरेको खुलेको छ ।

पूर्व आयोजना प्रमुख तथा ललितपुर जिल्लाका जिल्ला आयुक्त सफल श्रेष्ठले आयोजनाका पहुँचवाला लाई मौखिकरुपमा निःशुल्क जग्गा बाँडेको भेद खुलेको हो । उनले पूर्व सहयोग समितिका सदस्य मुकुन्द वाग्ले, पूर्व सहयोग समिति अध्यक्ष पुरुषोतम बरालका साढुभाइ रुमोज पोखरेललाई करिब तीन आना जग्गा निःशुल्क भोगचलन गर्न दिएको पाइएको छ । आयोजनाले रुमोज पोखरेललाई जग्गा विकासको योगदानबापत आयोजनालाई उल्टै रकम तिर्नुपर्ने देखाइएको छ ।

आयोजना प्रमुख श्रेष्ठले पोखरेललाई निशुल्क जग्गामात्र दिएनन्, सरकारी पैसामा अतिक्रमण गरेको जग्गामा पक्की कम्पाउन्डवाल समेत आयोजनाबाटै लगाइदिएको खुलेको छ । उनले ललितपुर जिल्ला आयुक्त कार्यालयमा रहँदा यस्ता थुप्रै अनियमितता गरेको भेटिएको छ ।

श्रेष्ठले रिपल्टिङ् नक्साविपरीत जग्गा बितरण गरेका थिए । उनी तीन बर्ष जति आयोजना प्रमुख थिए । भेल्पा–हात्तीवन आयोजना क्रोनिक भएपछि उनी प्राधिकरणकै भक्तपुर जिल्ला आयुक्तमा सरुवा मिलाएर गएका थिए । हाल उनी भक्तपुर जिल्ला आयुक्त कार्यालयमा कार्यरत छन् ।

प्राधिकरणले अबैध प्लटिङ रोक्ने निर्णय गरे पनि उनले भक्तपुरमा कुनै पनि अबैध प्लटिङ रोकेनन् । उनले अबैध प्लटिङ नरोकेबापत जग्गा दलालबाट अनुचित लाभ लिएको आरोप लागेको छ । भुजीकिक हाउजिङ कम्पनीसहितका केही कम्पनीबाट रोपनीको दररेट तोकेर घुस लिई काक्राबारी, भाइरल प्लटिङ नंखेल लगायतका जग्गामा करोडौं कमिसन खाएको आरोप छ ।

उनले संचालक समितिको निर्णयबिपरीत प्राधिकरणलाई प्लटिङ रोक्ने अधिकार नरहेको भन्दै गलत प्रतिवेदन बुझाएका थिए । त्यस्तै ललितपुरका पूर्व जिल्ला आयुक्त जगदिश लामिछानेले आयोजनाकै नाममा रहेको जग्गा कीर्ते पत्र मार्फत् बैंकिङ प्रयोजनका लागि सिफारिस समेत गरेको भेटिएको छ ।

लामिछानेले सहयोग समितिका पूर्व कोषाध्यक्ष गिरी श्रेष्ठलाई करिब दुई आना जग्गा भोगचलन गर्न दिएका थिए । साथै आयोजनाकै नाममा रहेको जग्गामा ऋण निकाल्न त्यस समयका करारका शाखा अधिकृत पितराज कोइराला र जगदिश लामिछाने मिलेर सिफारिस दिएको पाइएको छ

लामिछाने र श्रेष्ठ दुवै पूर्व विवादित सचिव डा. रमेशप्रसाद सिंहनिकट डीई हुन् । उनीहरु लामो समयसम्म प्राधिकरणको आयोजनामा कार्यरत थिए । आफैंले अबैध रुपमा बाँडेको जग्गाको संरचनामा आयोनाले नै डोजर चलाएपछि उनीहरु सकसमा परेका हुन् ।

सहयोग समिति पूर्व सदस्य मुकुन्द वाग्लेले भेल्पा–हात्तीवन आयोजनाको जग्गा सफल श्रेष्ठ र पितराज कोइरालाले मौैखिक रुपमा दिएको अभिब्यक्तिको भिडियो समेत नेपालफेसलाई प्राप्त भएको छ ।