नगर प्रहरी निलम्बन गर्ने निर्णयप्रति राजु पाण्डे दुःखी

काठमाडौं । वालेन्द्र शाह काठमाडौं महानगरपालिकाको मेयर हुँदा नगर प्रहरीको निमित्त एसएसपी रहेका सांसद राजुनाथ पाण्डेले गणेश नेपालीका परिवारसँग गरेको सहमतिमा नगर प्रहरीलाई निलम्बन गर्ने निर्णयप्रति दुःख ब्यक्त गरेका छन् ।

आइतबार सरकार र गणेश नेपालीका परिवारबीच भएको सहमतिमा नगरप्रहरीद्वय मीना तामाङ र मीना नगरकोटीलाई निलम्बन गर्ने बुँदा पनि उल्लेख छ । जुन बुँदाप्रति पाण्डेले दुःख ब्यक्त गरेका हुन् । उनले निलम्बनमा परेका नगरप्रहरीलाई अआत्तिन आग्रह गर्दै न्याय पाउने विश्वास पनि ब्यक्त गरेका छन् ।

सामाजिक संजालमा आइतबार राति पाण्डेले लेखेका छन्–‘२०८३ असार २६ गते त्रिपुरेश्वर घटनामा दिवंगत हुनुभएका गणेश नेपालीप्रति हार्दिक श्रद्धाञ्जली व्यक्त गर्दछु र शोकमय परिवार प्रति हार्दिक समवेदना प्रकट गर्दछु ।

त्यसैगरी काठमाडौं महानगरपालिकाका नगर प्रहरीद्वय मीना तामाङ र मीना नगरकोटीलाई निलम्बन गर्ने निर्णय प्रति दुःख व्यक्त गर्दछु । महिला भएर पनि १२ घण्टा बुट लगाई इमानदारीपूर्वक तोकिएको जिम्मेवारी पालना गर्ने उहाँहरूको साहसलाई सम्मान गर्दछु ! नआत्तिनुहोला, अवश्य न्याय मिल्नेछ र उक्त घटनालाई अतिरञ्जित गर्नेगरी सदनदेखि सडकसम्म रोइलो गर्ने पात्रहरूलाई नेपाली जनताले अवश्य पनि मूल्याङ्कन गर्नुभएको होला ।

राजनीति गरी आफ्नो अभिष्ट पूरा गर्न खोज्ने सबै खाले व्यक्तिहरूलाई अवश्य पनि नेपाली जनताले चिनिसक्नुभएको छ । र, समय आउँदा उचित जवाफ दिनेछ ।’

राजु पाण्डे नगर प्रहरीको प्रमुख भएदेखि नै महानगरभित्र फुटपाथमा पसल राख्नेदेखि पार्किङ गर्नेसम्मलाई अमानवीय ज्यादति गर्न सुरु गरिएको र त्रिपुरेश्वरमा भएको गणेश नेपालीको मोटरसाइकलमा भएको ह्वीललक त्यसकै पराकाष्टा भएको भन्दै सामाजिक संजालमा आवाज पनि प्रकट भइरहेका छन् ।