ब्रिजकोर्ष र इन्ट्रान्स तयारी कक्षा संचालनमा रोक, अटेर गरे कडा कारबाही

काठमाडौं । शिक्षा, विज्ञान तथा प्रबिधि मन्त्रालयले विद्यालय तहका विभिन्न कक्षा र उच्चशिक्षाका विभिन्न तहमा भर्ना प्रक्रिया प्रारम्भ हुनुभन्दा अगाडि भर्नालाई लक्षित गरी विभिन्न संस्थाहरूले प्रवेश परीक्षा तयारी(इन्ट्रान्स प्रिपेरेसन) कक्षा एवम् ब्रिजकोर्षका नामका कार्यक्रमहरू सञ्चालन गर्न रोक लगाएको छ ।

सरकारको शासकीय सुधारसम्बन्धी १ सय कार्यसूचीमा परीक्षा तयारी कक्षा र ब्रिजकोर्ष कार्यक्रम संचालनमा रोक लगाउने उल्लेख थियो । त्यही प्रतिबद्धता अनुसार शिक्षा मन्त्रालयले आइतबार त्यस्ता कार्यक्रम संचालनमा रोक लगाएको हो ।

यस्ता कार्यक्रमले विद्यार्थीको मनोविज्ञान तथा शिक्षामा समतामूलक पहुँचमा नकारात्मक प्रभाव पार्ने र विद्यार्थीका लागि अनावश्यक आर्थिक बोझसमेत पर्न जाने देखिएकाले रोक लगाएको मन्त्रालयका प्रवक्ता शिवकुमार सापकोटाले आइतबार जारी गरेको विज्ञप्तिमा उल्लेख छ ।

मन्त्रालयको विज्ञप्तिमा भनिएको छ–प्रवेश परीक्षा तयारी(इन्ट्रान्स प्रिपेरेसन) कक्षा एवम् ब्रिजकोर्षका नाममा विभिन्न संस्थाहरूले सञ्चालन गर्दै आएका त्यस्ता कार्यक्रमहरू आगामी २०८३ साल वैशाख १ गतेदेखि पूर्णरूपमा बन्द गर्न यस मन्त्रालयको माननीय मन्त्रीस्तरबाट मिति २०८२ चैत १३ गते निर्णय भएकाले सोही अनुसार गर्नु गराउनुहुन सम्बन्धित सबैमा यो निर्देशन गरिएको छ ।

साथै, यस्ता कार्यक्रमहरू सञ्चालन भए नभएको अनुगमन गरी सञ्चालन गरेको पाइएमा प्रचलित कानुनबमोजिम कारबाहीको प्रक्रिया अगाडि बढाउनसमेत सम्बन्धित जिल्ला प्रशासन कार्यालयहरूलाई अनुरोध गरिन्छ ।

प्रवेश परीक्षा तयारी(इन्ट्रान्स प्रिपेरेसन) कक्षा एवम् ब्रिजकोर्षका नाममा विद्यार्थीसँग चर्को शुल्क असुली हुने गरेको छ । जुन शुल्क तिर्न बिपन्न बिद्यार्थीले नसक्ने र पहुँचवालाहरुले मात्र सक्छन् ।

यस्तो छ शिक्षा मन्त्रालयको निर्देशन