दुर्गा प्रसाईं फेरि पक्राउ

काठमाडौं । चुनाव भाँड्नसक्ने आशंकामा प्रहरीले दुर्गा प्रसाईलाई फेरि पक्राउ गरेको छ । राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजकसमेत रहेका मेडिकल ब्यवसायी प्रसाईँलाई प्रहरीले आज बिहान पक्राउ गरेको छ ।

जिल्ला प्रहरी परिसर भक्तपुरको टोलीले उनलाई बिहान निवासबाटै पक्राउ गरेको हो ।
प्रसाईँको पारिवारिक स्रोतका अनुसार आज बिहान ६ बजे नै भक्तपुरको प्रहरी टोली निवास वरिपरि तैनाथ थियो । उनलाई पौने आठ बजेतिर पक्राउ पुर्जी थमाएर प्रहरीले लगेको हो ।

प्रसाईलाई दिइएको पक्राउ पुर्जीमा ‘सार्वजनिक शान्तिविरुद्धको मुद्दाको अनुसन्धानका लागि’ भन्ने ब्यहोरा उल्लेख छ । प्रसाईँलाई जिल्ला प्रहरी परिसर भक्तपुरमा राखिएको प्रहरीले जनाएको छ ।

प्रसाईँ पछिल्लोपटक ४ फागुनमा काठमाडौंमा पक्राउ परेका थिए । उनी १३ फागुनमा रिहा भएर निर्वाचन हुनै नसक्ने अभिब्यक्ति दिंदैआएका थिए । उनलाई गैरकानुनी रूपमा हिरासतमा राखिएको दाबीसहित श्रीमती उमा प्रसाईँले दायर गरेको बन्दी प्रत्यक्षीकरणको रिटमा सुनुवाइ गर्दै सर्वोच्च अदालतका न्यायाधीशद्वय मनोजकुमार शर्मा र मेघराज पोखरेलको इजलासले थुनामुक्त गर्न आदेश दिएको थियो ।