आयुर्वेद चिकित्सक संघ श्यामबाबुको मागीखाने भाँडो, २ बर्षसम्म महाधिवेशन गर्न आलटाल

काठमाडौं । आयुर्वेद चिकित्सकहरुको छाता संगठन आयुर्वेद चिकित्सक संघको अधिवेशन २ बर्षदेखि हुन सकिरहेको छैन । आयुर्वेद चिकित्सक संघको अध्यक्षको रुपमा आयुर्वेद तथा वैकल्पिक चिकित्सा बिभागका निमित्त महानिर्देशक डा. श्यामबाबु यादव छन् ।

२०७८ चैतमा २ बर्षका लागि डा. श्यामबाबुको नेतृत्वमा कार्यसमिति चयन भएको थियो । तर ४ बर्षसम्म उनले महाधिवेशन नगरी पद ओगटेर आएका थिए ।  २ बर्षअघि नै महाधिवेन गरेर नेतृत्व हस्तान्तरण गर्नुपर्नेमा श्यामबाबुले पद ओगटिरहेका छन् ।

महाधिवेशन गर्नतिर उनको चासो नै देखिएको छैन । ब्यापक दबाबपछि आगामी २०८२ चैत २० र २१ गते संघको ११ औं महाधिवेशनको मिति तोकिएको छ । तर त्यो मितिमा पनि महाधिवेशन नगर्न श्यामबाबु लागिरहेका छन् । श्यामबाबुको पदप्रतिको आशक्तिले गर्दा देशभर १ हजार आयुर्वेद चिकित्सकको छाता संगठनको रुपमा रहेको उक्त संघको ११ औं महाधिवेशन चैतमा हुने कुरामा पनि डाक्टरहरु विश्वस्त हुन सकेका छैनन् ।

उनले उक्त संघको अध्यक्ष पदलाई ब्यक्तिगत लाभका लागि दुरुपयोग गरेको आरोप छ । आफ्नो प्राइभेट लिमिटेडकम्पनीजस्तै संघलाई स्वार्थपूर्तिको थलो बनाएका छन् । चिकित्सकहरुको छाता संगठनको रुपमा रहेको नेपाल चिकित्सक संघको अध्यक्षमा डा. अनिलविक्रम कार्की छन् । जसले नियमित अधिवेशनका लागि मिति घोषणा गरी कार्यभार हस्तान्तरण गर्न आतुर छन् ।

भरतपुर क्यान्सर अस्पतालमा कार्यरत चिकित्सक कार्कीले आफ्नै पहलमा धेरै चिकित्सकलाई महत्वपूर्ण पद दिलाए पनि आफू भने संघकै गतिबिधिमा मात्र केन्द्रित हुँदैआएका छन् । सोही सरहको पेशागत संगठन आयुर्वेद चिकित्सक संघ भने अध्यक्ष श्यामबाबुको ब्यक्तिगत लाभको लागि दुरुपयोग हुँदैआएको महसुस आम चिकित्सकहरुले गर्दैआएका छन् । उनको अक्षम नेतृत्वको आयुर्वेद चिकित्सकहरुमा संघप्रति बितृष्णा पैदा भएको छ ।

संघलाई मागीखानो भाँडो बनाएकोमा चिकित्सकहरु रुष्ट छन् । आयुर्वेद चिकित्सा पद्धतिको विकास र चिकित्सकहरुको पेशागत हकहितका लागि गठित संघ श्यामबाबुको ब्यक्तिगत हितका लागि मात्र प्रयोग भएको देखिन्छ ।

श्यामबाबु अध्यक्ष भएपछि संघ संंस्थागत रुपमा संचालन हुन नसकेको र उनले झोलामा संघका लेटरप्याडदेखि छापसमेत बोकेर बाटा बाटामा आफ्नो स्वार्थका काम गर्दैआएको आरोप छ। श्यामबाबु टीमवर्कमा काम नगर्ने चिकित्सकका रुपमा चिनिन्छन् ।

दसौं तहका डा. श्यामबाबु  बर्षौदेखि आयुर्वेद तथा वैकल्पिक चिकित्सा बिभागको निमित्त महानिर्देशकमा कार्यरत छन् । तर ११ औं तहका बरिष्ठ आयुर्वेद चिकित्सक रामआधार यादव अतिरिक्त समूहमा जिम्मेवारीबिहीन छन् ।  दसौं तहका कनिष्ट श्यामबाबुले बिभाग चलाइरहेका छन् ।

केही तराईबासीलाई जेनजीको रुपमा स्वास्थ्य मन्त्रालयका मन्त्रीदेखि सचिवसम्मलाई दबाब दिएर बिभागको महानिर्देशकमा टिक्न सफल हुँदैआएका श्यामबाबुलाई मन्त्री सुधा गौतमले साथ दिएकी छन् । केही दिनअघि भारतको एक कार्यक्रममा मन्त्री गौतमले यादवलाई संगै लिएर गएकी थिइन् ।

केही दिनअघि श्यामबाबुको ठाउँमा रामआधारलाई महानिर्देशक बनाउन उठिसकेको टिप्पणी सचिव डा. बिकास देवकोटालाई मन्त्री गौतमले स्थगन लगाएकी थिइन् । मन्त्रीलाई उनले राम्रै खर्चपानीको ब्यवस्था गरेपछि बरिष्ठ डाक्टरलाई बरन्डामा कनिष्ट श्यामबाबुलाई निमित्त महानिर्देशकमा थमौती गरिएको छ ।

जेनजी बिद्रोह सुशासनका लागि भएको थियो । तर बरिष्ठ डाक्टरलाई मन्त्रालयको बरन्डामा राखेर कनिष्टलाई बर्षौदेखि बिभागको निमित्त महानिर्देशकमा राख्नु पनि भ्रष्टाचार नै हो । तर नागरिक सरकारकी मन्त्री डा गौतम यस्तै भ्रष्टाचारमा रमाउँदैआएकी छन् । जेनजी आन्दोलन पछि पनि स्वास्थ्य मन्त्रालयमा एकरत्ति सुधार हुन सकेको छैन, बरु सेटिङ झन् बढी हुने गरेको गुनासो छ ।