चितवनमा रैथाने घुमुवाको रजगज, नयाँ एसपीले के गर्लान् ?

काठमाडौं । नेपाल प्रहरीका चौकीदेखि जिल्ला हुँदै प्रदेशका इन्चार्जहरुले सादा पोशाकमा घुमुवा खटाउने गरेका छन् । विशेषगरी भारतसँग सीमा जोडिएका तराईका जिल्लामा घुमुवा खटाउने गरिएको छ । अपराध र तस्करीका सूचना लिन भन्दा पनि प्रहरीका इन्चार्जहरुले अतिरिक्त कमाइका लागि घुमुवा खटाएको आरोप लाग्ने गरेको छ ।

२०६७ मा भीमबहादुर रावल गृहमन्त्री हुँदा र उपेन्द्रकान्त अर्याल प्रहरी महानिरीक्षक हुँदा बर्षौंदेखि तराईका जिल्लामा सादा पोशाकमा खटाइएका घुमुवाहरुलाई पहाडी जिल्लामा सरुवा गर्दा मधेशमा सशस्त्र समूहको गतिबिधिमा कमी आएको थियो । पहाडी जिल्लामा खेदिएका ती बदनाम घुुमुवाहरु पुनः शक्तिकेन्द्रमा पहुँच पुर्याएर तराईकै जिल्लामा फर्किएका थिए ।

घुमुवा–तस्करको सेटिङमा तराईका जिल्लामा तस्करी बढ्ने र लक्ष्य अनुसार राजस्व असुली हुन छाडेको छ । रवि लामिछाने गृहमन्त्री हुँदा घुुमुवा खटाउन प्रहरीका इन्चार्जहरु हच्किंदा तस्करीमा कमी आएको केही दिनअघि अर्थमन्त्री बिष्णु पौडेलललाई ब्यापारीहरुले नै सुनाएका थिए ।

यसैक्रममा जिल्ला प्रहरी कार्यालय चितवनको नेतृत्व पनि घुमुवा खटाउने र असुलीमा बारम्बार चर्चामा आइरहन्छ । कोशी, मधेश र लुम्बिनी प्रदेशबाट आउने राजमार्ग भएकाले चितवनका थाना चौकीहरुमा बस्नका लागि चर्को हानथाप हुने गरेको छ । सबै जिल्लाका मानिस बसोबास गर्ने जिल्लाका रुपमा चिनिएको चितवनमा ९ बर्ष, १० बर्षदेखि घुमुवाका रुपमा खटिएकाहरु पनि छन् । विगतमा घुमुवा भई विवादमा परेकाहरु पनि पुनः चितवनमा फर्कीफर्की सरुवा भएर आएका छन् ।

सिपाहीमा भर्ना भएका र जागिरको सुरुदेखि कार्यरत सई धर्म पौडेल ११ बर्षदेखि चितवनमै छन् । सईमा भर्खरै बढुवा भएका उनको तलबले छोराछोरीलाई पढाउनसमेत पुग्दैन । तर उनले भरतपुर विमानस्थलसँगै त्रिचोकमा २ कठ्ठा जग्गामा तलाको घर बनाएका छन् । जहाँको जमिनमात्रै प्रतिकट्ठा करोड भन्दा बढी मूल्य पर्दछ ।

भरतपुर नगरपालिकाको गीतानगरमा १० कट्ठा खेत किनेका छन् । जुन ठाउँमा प्रतिकट्ठाको हालको मन्दीमा ३० लाख रुपैयाँ पर्छ । महंगो बोर्डिङका रुपमा लिइने भरतपुरको बाल्मिकी शिक्षा सदनमा छोराछोरी पनि अध्ययन गराएका छन् ।

पौडेल एक उदाहरणमात्र हुन्, दरबन्दी अन्यत्र भए पनि सोर्सफोर्सका आधारमा सधैं चितवनमै बस्ने, टेण्डर कबोल गरेर मातहतका थाना चौकीमा जाने र हाकिमदेखि आफ्ना लागि मात्र अकूत कमाउनेहरु थुप्रै जुनियर अधिकृत छन् ।

जुगेडीदेखि लोथरसम्मका राजमार्गका चौकीमा बसी अकूत कमाएका सई ठाकुर पनेरुका बारेमा समाचार आएपछि यसअघिका एसपी राजन लिम्बुले जिल्लामा तानेका थिए । ठाडो उजुरीमा ९ बर्षदेखि असई राजेन्द्र गौतमको हालीमुहाली छ । शान्तिसुरक्षाको निवेदनमा समेत घुस लिने गरेको आरोप उनीमाथि लाग्ने गरेको छ ।

लिम्बुभन्दा अघिल्ला एसपीका पालादेखिका घुमुवा असई हरि भट्टराईलाई हालका एसपी गोविन्द पुरीले समेत निरन्तरता दिएका छन् । सिन्धुपाल्चोकको हेलम्बुमा दरबन्दी रहेका सिकेन्द्र साहलाई रकम असुलेर चितवनमा ल्याइएको छ । भर्खरै एआईजी बढुवा भएका बागमतीका पूर्वडीआईजी कृष्णहरि शर्माले साहलाई चितवनमा काजसरुवा गरेका थिए ।

मनकामना अटो एण्ड रिकन्डिसन वर्कसप जगतपुरका सञ्चालक ‘दीपु’ भन्ने दीपेन्द्र श्रेष्ठलगायतका चोरीका मोटरसाइकलदेखि गाडीका कारोबारीसँग यिनै घुमुवाले मासिक रुपमा नजराना लिने गरेका छन् । मोटरसाइकलदेखि गाडीका पार्टपूर्जा तस्करीबाट ल्याउने धन्दामा पनि दिपु संलग्न रहेका छन् । उनका बिरुद्ध धेरै उजुरी परे पनि उनलाई घुमुवाहरुले संरक्षण गर्ने गरेका छन् ।