सरकार वार्ता र संवाद गर्न तयार भए पनि शिक्षकको आन्दोलन नरोकिने

काठमाडौं । शिक्षकका माग सम्बोधन गर्न सरकारले बैशाख १२ गते संसद अधिवेशन बोलाए पनि आन्दोलन नरोकिने नेपाल शिक्षक महासंघले जनाएको छ ।

महासंघले जारी आन्दोलनलाई निरन्तरता दिने भएको छ । महासंघका अध्यक्ष लक्ष्मीकिशोर सुवेदीले आन्दोलन जारी रहने जानकारी दिएका छन् । सामाजिक संजाल फेसबुकमार्फत् उनले आन्दोलन नरोकिने जानकारी दिएका हुन् ।

मंगलबार बसेको मन्त्रिपरिषद बैठकले बजेट अधिवेशन आह्वान गर्ने र संघीय संसदमा विचाराधीन रहेको विद्यालय शिक्षा विधेयक यथाशक्य पारित गर्ने निर्णय गरेको थियो । यससँगै सरकारले १३ दिनदेखि जारी आन्दोलनका कार्यक्रम रोक्न शिक्षकहरूलाई आग्रह गरेको थियो । तर, महासंघले आफूहरूले उठाएका विषयमा राज्य यथावत् अनुदार देखिएको निष्कर्ष निकाल्दै प्रदर्शनलाई निरन्तरता दिने जनाएको छ ।

महासंघका अध्यक्ष सुवेदीले लेखेका छन्–‘देशभरिका सबै साथीहरू आन्दोलनको यो निर्णायक घडीमा हामी तपाईँलाई काठमाडौँको आन्दोलनको मोर्चामा पर्खिरहेका छौँ । यो आन्दोलनले तपाईंको सक्रिय सहभागिता खोजिरहेको छ । तुरुन्तै काठमाडौँ आइपुग्नुहोला ।’