दुर्गा प्रसाईंलाई झापाँ हुँदै हवाईमार्गबाट काठमाडौं ल्याउने तयारी

काठमाडौं । भारतको आसाम प्रहरीले पक्राउ गरेका दुर्गा प्रसाईंलाई आज नेपालको काँकरभिट्टा प्रहरीलाई बुझाउँदैछ । नेपाल–भारतबीच सुपुर्दगी सन्धि नभएकाले दुबै देशका आरापीहरुलाई पक्राउ गरिसकेपछि एक अर्का देशलाई सुटुक्क बुझाउने गरिएको छ ।

कुख्यात अपराधी बब्लु दुवेलाई नेपालले भारतलाई बुझाएको थियो भने मनोज पुनलाई भारतले नेपालको सीमाक्षेत्रसम्म ल्याएपछि इन्काउन्टरमा मारिएका थिए । त्यसो त नेपालीलाई भूटानी शरणार्थी बनाएर अमेरिका पठाउने धन्दाका नाइके बेचन झालाई दिल्लीले गड्डाचौकीमा ल्याएर बुझाएको थियो ।

दुर्गा प्रसाईलाई पनि आसाममा भारतीय प्रहरीले नेपाल प्रहरीको सूचनाका आधारमा पक्राउ गरेको थियो । तर नेपालमा नल्याइसकेकाले प्रहरीले पक्राउ नपरेको भन्दैआएको छ । तर केहीबेरअघि उनलाई काँकडभित्तामा ल्याइसकिएको र विमानमार्फत् काठमाडौंमा ल्याइँदैछ ।

दुर्गा प्रसाइँ निकट स्रोतका अनुसार उनलाई मानवअधिकारकर्मीको रोहबरमा नेपाल प्रहरीलाई बुझाइँदैछ । प्रसाईंलाई भारतबाट नेपाल ल्याइँदै गरेको हल्लापछि उनका आफन्त र शुभचिन्तकको मेची पुलमा भीड लागेको छ । तर, नेपाल प्रहरीले भने अर्कै नाकबाट प्रसाइँलाई नेपाल ल्याउने तयारी गरेको छ ।

प्रहरी स्रोतका अनुसार मेची पुलमा भीड लोगेपछि प्रसाईँलाई गलगलिया नाकाबाट नेपाल ल्याउने गरी रुट परिवर्तन भएको छ । गलगलिया नाका झापाको भद्रपुरसँग जोडिएको भारतीय सीमा हो । उनलाई लिन झापाका प्रहरी प्रमुख मिलन केसी गलगलिया हिँडेका छन् ।

प्रहरी श्रोतका अनुसार भारतीय प्रहरीबाट गलगलियामा प्रसाईँलाई हस्तान्तरण भएपछि चन्द्रगढी विमानस्थलबाट प्रसाईँलाई काठमाडौँ ल्याइने तयारी गरिएको छ ।