आईजिपी कुँवरसहित ९ प्रहरी अधिकारी भोलिबाट अनिवार्य अवकाशमा जाँदै

काठमाडौँ । नेपाल प्रहरीका महानिरीक्षक (आईजिपी) बसन्तबहादुर कुँवरसहित ९ जना वरिष्ठ प्रहरी अधिकारी भोलि (सोमबार) बाट अनिवार्य अवकाशमा जाँदैछन्।

प्रहरी नियमावलीअनुसार ३० वर्षे सेवा अवधि पूरा गरेपछि ४ चैतको राति १२ बजेबाट कुँवरसहित अन्य प्रहरी अधिकारी अवकाशमा जान लागेका हुन्। यसअघि पनि सोही नियमअनुसार उमेर हदका कारण प्रहरीका वरिष्ठ अधिकारीहरू अवकाश पाइसकेका छन्।

आईजी कुँवरसँगै अतिरिक्त महानिरीक्षक (एआईजी) टेकप्रसाद राई, बुद्धिराज गुरुङ, कुवेर कडायत, दुर्गा सिंह र जनकराज भट्टराई अवकाशमा जाँदैछन्। यस्तै, प्रहरी नायब महानिरीक्षक (डिआइजी) गणेश चन्द, भोला रावल र ध्रुवराज राउत पनि भोलिदेखि अनिवार्य अवकाशमा जाने भएका छन्।

उनीहरू २०५१ सालको प्रहरी ब्याचका अधिकारी हुन्, जसले ५ चैत २०५१ मा प्रहरी सेवामा प्रवेश गरेका थिए। सोही ब्याचका एसपी श्यामकुमार राई र सञ्जयबहादुर राउत केही दिनअघि नै अवकाशमा गइसकेका छन्।

आईजी कुँवरको अवकाशपछि नयाँ प्रहरी महानिरीक्षक नियुक्ति प्रक्रिया अघि बढ्नेछ। हाल आईजिपीका लागि प्रतिस्पर्धामा रहेका एआईजी दीपक थापा, सुदीप गिरी र टेकबहादुर तामाङ मुख्य दाबेदारका रूपमा अघि आएका छन्।

नयाँ आईजिपीको नियुक्तिसँगै एआईजी र डिआइजी पदका बढुवाका प्रक्रिया पनि अघि बढ्नेछ। यसका लागि प्रहरी संगठनभित्र आन्तरिक प्रतिस्पर्धा तीव्र हुने देखिएको छ।