चोरी तथा सवारी ज्यान मुद्दामा फरार दुई जना पक्राउ

काठमाडौं । जिल्ला प्रहरी कार्यालय बाराले चोरी तथा सवारी ज्यान मुद्दामा फरार दुई जनालाई पक्राउ गरेको छ । जिल्ला अदालत बाराबाट कैद सजाय भई फरार भएका दुई जनालाई आज पक्राउ गरेको हो ।

लुकीछिपी बस्दै आएका निजगढ नगरपालिका वडा नम्बर ६ बस्ने विक्रम घलान र जीतपुर सिमरा ५ बस्ने सुनिल पासवानलाई पक्राउ गरेको प्रहरीले जानकारी दिएको छ । जिल्ला अदालत बाराबाट घलानमाथि चोरी मुद्दा अन्तर्गत २० दिन कैद र एक हजार जरिवानाको फैसला थियो । यसैगरी पासवानमाथि ३ महिना कैद र २ हजार रुपैयाँ जरिवानाको फैसला भएको थियो ।

जिल्ला अदालतबाट कैद र जरिवानाको फैसला आएपछि दुवै जना फरार भएको जनाउँदै सर्च अभियान अन्तर्गत पक्राउ गरिएको प्रहरीले जनाएको छ। पक्राउ परेका दुवै जनामाथि आवश्यक कानुनी प्रक्रिया अगाडि बढाइएको प्रहरीले बताएको छ ।