सेती प्रादेशिक अस्पताल नभई माफिया अस्पताल हो : स्वतन्त्र सांसद जोशी

काठमाडौं। सुदूरपश्चिम प्रदेशसभाका स्वतन्त्र सांसद डा. तारा जोशीले सेती प्रादेशिक अस्पताललाई माफिया अस्पतालको संज्ञा दिएका छन् । प्रदेशसभामा बजेटमाथिको छलफलका क्रममा उनले विभिन्न जिल्लाबाट आएका बिरामीहरूले सहज रुपमा उपचार नपाएको भन्दै त्यसलाई माफिया अस्पतालको संज्ञा दिएका हुन् ।

पटक पटक अस्पतालका विषयमा प्रश्न उठाउँदा पनि सरकारले चासो नदिएको उनको गुनासो छ । प्रदेश सांसद जोशीले बजेट सैद्धान्तिक रूपमै गलत रहेको बताएका छन् । सरकार आवश्यकभन्दा अनावश्यक विषयमा केन्द्रित रहेको उनको भनाइ छ ।

प्रदेश सरकारको प्राथमिकतामा परेको चिडियाखाना आवश्यक नरहेको भन्दै उनले भने, ‘बाजुराको कुपोषित बालकलाई लिटो बाँडिरहेको मुख्यमन्त्रीको तस्बिरभन्दा चिडियाखानामा बाघलाई मासु खुवाउँदै गरेको मुख्यमन्त्रीको तस्बिर भाइरल हुने सम्भावना धेरै छ । त्यसैले चिडियाखाना बनाओस् सरकारले ।’