बैतडीमा बस दुर्घटना हुँदा एकको मृत्यु, ३९ जना घाइते

बैतडी । बैतडीको मेलौलीमा बस दुर्घटना भएको छ । बैतडीदेखि कञ्चनपुरको महेन्द्रनगर जाँदै गरेको उक्त बस दुर्घटना हुँदा एकजनाको मृत्यु भएको छ।

आज पवनदूत यातायातको लु २ ख २०११ नम्बरको बस पञ्चेश्वरको कुलाउदेखि महेन्द्रनगरका लागि छुटेको बस मेलौली–पञ्चेश्वर सडक खण्डअन्तर्गत मेलौली नगरपालिका-७ स्वाखानीमा दुर्घटनामा भएको र दुर्घटनामा परेर पञ्चेश्वर गाउँपालिका-६ रन्तोलीका २८ वर्षिय उमेश भण्डारीको मृत्यु भएको र अन्य ३९ जना घाइते भएको जिल्ला प्रहरी कार्यालय बैतडीले जनाएको छ।

घाइतेहरू मध्ये १६ जनाको अवस्था गम्भीर रहेको छ उनीहरुलाई थप उपचारका लागि डडेल्धुरा पठाइएको प्रहरीले बताएको छ।

केही घाइतेहरूको पहिचान हुन बाँकी रहेको र २२ जना घाइतेहरूलाई केशरपुर प्राथमिक स्वास्थ्य केन्द्र मेलौलीमा उपचार भइरहेको छ।

यस दुर्घटनाबारेमा थप जानकारी आउन बाँकी रहेको प्रहरीले बताएको छ।