देशभर तापक्रम बढ्दो क्रममा, तराईमा लू कायमै

काठमाडौं । हाल देशमा पश्चिमी वायुका साथै स्थानीय वायुको आंशिक प्रभाव रहेको छ।

मुलुकभर दिनप्रतिदिन बढ्दै गएको गर्मीले जनजीवन अस्तव्यस्त भएको छ । तराईका क्षेत्रमा गत शुक्रबारदेखि लू लागिरहेको छ भने यो क्रम अझै चार पाँच दिनसम्म रहने मौसम पूर्वानुमान महाशाखाका मौसमविद् गोविन्द झाले बताए ।

आज कोशी, गण्डकी र कर्णाली प्रदेशमा मौसम बदली हुँदा त्यो क्षेत्रमा केही राहत महसुस हुने उनले बताए ।

यद्यपि तराईको लू भने झनै बढ्ने देखिएको छ । बुधबार तराईका क्षेत्रमा ४२.२ डिग्री सेल्सियससम्म तापक्रम पुगेको छ भने आज थप एक डिग्री बढ्ने अनुमान महाशाखाको छ ।

हिजो जनकपुरमा ४२.२, भैरहवामा ४१.८, सिमरामा ४१.७, नेपालगञ्जमा ४१.६, विराटनगरमा ४१ तथा धनगढीमा ३९.९ डिग्री सेल्सियस तापक्रम रहेको थियो ।

आज मौसम बदली नहुने क्षेत्रमा कम्तीमा एक डिग्रीसम्म बढ्ने मौसमविद् झाले बताए ।

न्यूनतम तापक्रमसमेत बढेको छ । जनकपुरमा २७, भैरहवामा २६.८, धरानमा २६.८, सिमरामा २६ डिग्री सेल्सियस रहेको थियो ।

आज जनकपुरमा बढेर २८.८, विराटनगरमा २८.८, भैरहवामा २६.४, सिमरामा २५.६ डिग्री रहेको छ ।

काठमाडौं उपत्यकामा पनि गर्मी निकै बढेको छ । अधिकतम तापक्रम ३२.१ डिग्री तथा न्यूनतम तापक्रम १८.८ डिग्री सेल्सियस रहेको छ ।

काठमाडौंमा दिउँसो मौसममा केही बदलीजस्तो देखिए पनि अधिकतम तापक्रम एक डिग्रीसम्म बढ्न सक्ने देखिएको छ ।

हाल देशमा पश्चिमी वायुका साथै स्थानीय वायुको आंशिक प्रभाव रहेको छ ।