विश्व बैंकको ऋण सहायता स्वीकार गर्ने सरकारको निर्णय

काठमाडौं । सरकारले विद्यालय क्षेत्र रूपान्तरण कार्यक्रमका लागि विश्व बैंकबाट १२० मिलियन अमेरिकी डलर ऋण सहायता स्वीकार गर्ने निर्णय गरेको छ । आज बसेको मन्त्रिपरिषद् बैठकले सो निर्णय गरेको हो ।

सरकारका प्रवक्ता रेखा शर्माका अनुसार बैठकले जापान सरकारबाट प्राप्त हुने मानव संशाधन विकास छात्रवृत्तिका लागि ४१ करोड बराबरको अनुदान सहायता स्वीकार गर्ने निर्णय गरेको छ । यस्तै, विद्यालय क्षेत्र आयोजनाका लागि शिक्षाका लागि विश्वव्यापी साझेदारी संस्थाबाट १९.७० मिलियन अमेरिकी डलर सहायत स्वीकृत गरेको छ ।

परराष्ट्र मामिला अध्ययन प्रतिष्ठान विकास समिति गठन तेस्रो संशोधन आदेश २०८० स्वीकृत गरेको छ । सरकारले हरेक वर्ष असोज २ गते राष्ट्रिय शिक्षा दिवस मनाउने लगायन निर्णय गरेको उनले बताइन् ।