ब्राउन सुगरसहित झापाबाट चार जना पक्राउ

झापा। प्रहरीले झापाबाट प्रतिबन्धित लागु औषध ब्राउन सुगरसहित चार जनालाई पक्राउ गरेको छ। पक्राउ पर्नेमा दमक नगरपालिका-९ निवासी २८ वर्षीय अरुण दनुवार, सोही ठाउँका २३ वर्षीय आश्विन राई, कमल गाउँपालिका–६ निवासी २५ वर्षीय न्युसन राई र दमक–२ निवासी २० वर्षीय अभिषेक राई रहेको जिल्ला प्रहरी कार्यालय झापाले जनाएको छ।

प्रहरीका अनुसार दमक–९ मा आइतबार बेलुका लागुऔषध खरिद बिक्री भइरहेको गोप्य सूचनाको आधारमा इलाका प्रहरी कार्यालय दमकबाट खटिएको प्रहरी टोलीले अरुण र आश्विन बसेको कोठाबाट ३ सय मिलिग्राम ब्राउन सुगर, एक थान डिजिटल तराजु र नगद ६० हजार ७ सय ५० रुपैयाँ बरामद गरेको थियो।

त्यस्तै प्रहरीले दमक–१ बाट न्युसन र अभिषेकलाई ८ सय मिलिग्राम ब्राउन सुगर, एक थान डिजिटल तराजुसहित पक्राउ गरेको हो। ब्राउन सुगरसहित पक्राउ परेका चारै जनालाई थप अनुसन्धानका लागि इलाका प्रहरी कार्यालय दमकमा राखिएको छ।