सामुदायिक विद्यालयलाई टाइ अनिवार्य नगर्न महानगरको निर्देशन

काठमाडौं । काठमाडौं महानगरपालिकाले सामुदायिक विद्यालयमा अध्ययन गर्ने विद्यार्थीलाई टाइ अनिवार्य नगर्न निर्देशन दिएको छ । महानगरपालिकाले आज सामुदायिक विद्यालयहरुलाई परिपत्र गर्दै यस्तो निर्देशन दिएको हो ।

टाइ अनिवार्य नगर्न महानगरपालिकाको शिक्षा समितिले गत २८ चैतमा निर्णय गरेको थियो । सोही निर्णय अनुसार विद्यालयहरुलाई आज परिपत्र गरिएको महानगरले जनाएको छ ।

टाइ लगाउँदा बालबालिकाहरुलाई असहज महसुस हुने, स्वतन्त्र रुपमा हिँड्डुलको महसुस गर्न नपाउने लगायतका गुनासो अभिभावकबाट आएपछि विद्यालयलाई टाइ अनिवार्य नगर्न भनिएको महानगर शिक्षा विभागका शिक्षा अधिकृत मोतिराज खनालले जानकारी दिए ।