उपेन्द्र यादव ५ हजार ८१ मतान्तरले विजयी, रमेश खरेलले ३ हजार कटाउन सकेनन्

बारा । प्रतिनिधिसभा सदस्य उपनिर्वाचनमा बारा–२ बाट जनता समाजवादी पार्टीका अध्यक्ष उपेन्द्र यादव ५ हजार ८१ मतान्तरले विजयी भएका छन् । यादवले जनमत पार्टीका उम्मेदवार शिवचन्द्रप्रसाद कुशवाहालाई पराजीत गरेका छन् ।

जिल्ला निर्वाचन कार्यालय बाराका प्रमुख सरोजकुमार चौधरीका अनुसार विजयी उम्मेदवार यादवले २८ हजार ४ सय १५ मत प्राप्त गरी बिजयी भएका छन् । पराजीत कुशवाहाले २३ हजार ३ सय ३४ मत पाए ।

एमालेका पुरुषोत्तम पौडेलले १० हजार २ सय १६ मत प्राप्त गरी तेस्रो भएका छन् । एमालेले गएको मंसिर ४ मा भएको निर्वाचनमा बारा २ मा ९ हजार समानुपातिक मत प्राप्त गरेको थियो । पौडेलले समानुपातिक मत भन्दा १ हजार बढी प्राप्त गरेका छन् ।

पूर्वडीआईजीसमेत रहेका राष्ट्रिय स्वतन्त्र पार्टीका रमेश खरेलले अपेक्षा अनुरुप मत प्राप्त गर्न सकेनन् । उनले २ हजार ८ सय २९ मत मात्र प्राप्त गरेका छन् । उनीपछि रहेका आम जनता पार्टीका उम्मेदवार अरुणकुमार ज्ञवालीले २ हजार ७ सय ३८ मत प्राप्त गरेका छन् । उनले गएको मंसिर ४ को निर्वाचनमा स्वतन्त्र उम्मेदवारी दिंदा साढे ७ हजार भन्दा बढी मत प्राप्त गरेका थिए ।