‘प्रसाद २’ को प्रदर्शन रोक्ने रिटमा उच्च अदालतले दिएन अन्तरिम आदेश

काठमाडौं । उच्च अदालत पाटनले ‘प्रसाद २’ को प्रदर्शन रोक्ने रिटमा अन्तरिम आदेश दिन अस्वीकार गरेको छ । आज न्यायाधीश राजेन्द्र खरेल र विमल सुवेदीको संयुक्त इजलासले सो आदेश दिएको हो ।

उच्च अदालतको यो आदेशसँगै फिल्म प्रदर्शनको बाटो खुलेको छ । आदेशमा ‘प्रसाद २’ फिल्म निर्माण गर्ने इजाजत सुवास थापाले प्राप्त नगरेर सुलभ प्रोडक्सन प्रालिले प्राप्त गरेकाले निवेदक केशव पाण्डे र सुलभ थापा प्रोडक्सन प्रालिबीच छुट्टै कानूनी उपचारमा जान सक्ने जनाइएको छ ।

‘रिटबाट चलचित्र प्रदर्शन रोक्नु सुविधा सन्तुलनको दृष्टिले उपयुक्त नदेखिएकाले निवेदन माग बमोजिम अन्तरिम आदेश जारी गरिरहनुपरेन’ उक्त आदेशमा उल्लेख छ ।

यसअघि ‘प्रसाद २’ को प्रदर्शन २४ चैतमा हुने तय भएको थियो । तर, केशव पाण्डेले दायर गरेको रिटमा उच्च अदालतले अल्पकालीन अन्तरिम आदेश जारी गरेका कारण प्रदर्शन रोकिएको थियो ।