यातायात कार्यालयबाट ११ बिचौलिया पक्राउ

पर्सा । बीरगंज यातायात कार्यालय पर्सा वीरगञ्जमा आएका सेवाग्राहीहरूलाई काम छिटोछरितो गरिदिन्छु भनी बार्गेनिङ गर्ने, कार्यालय परिसरभित्र फाइल च्यापी भित्र बाहिर गर्ने, प्रचलित कानून विपरीत अत्याधिक सेवा शुल्क लिने तथा सेवाग्राहीहरूलाई अनावश्यक हैरानी दिने ११ जना बिचौलियाहरुलाई प्रहरीले पक्राउ गरेको छ ।

बिचौलियाहरुका बारेमा पटक–पटक जनगुनासो प्राप्त हुन आएकाले मंगलबार दिउँसो १ बजे जिल्ला प्रहरी कार्यालय पर्साबाट खटिएको प्रहरी टोलीले अनुगमन गर्दा सो कार्य गर्दै गरेको अवस्थामा फेला पारी नियन्त्रणमा लिएको छ । पक्राउ परेकाहरुलाई ७ दिनको म्यादथप गरिएको छ ।

पक्राउ पर्ने बिचौलियाहरुमा वीरगञ्ज महानगरपालिका वडा नं १२ रानीघाट बस्ने वर्ष २५ का आलोककुमार यादव, बीरगंज १३ बस्ने बर्ष ४५ का किशोरकुमार दयाल, वडा नं १५ बस्ने बर्ष ४० का दिपलाल साह छन् ।

बीरगंज मनपा वडा नम्बर १३ का ४६ बर्षीय रामबाबु झा, बीरगंज मनपा ३ बस्ने वर्ष ३७ का रंजित गुप्ता, वडा नम्बर ११ बस्ने वर्ष २३ का लालबाबु महतो, वीरगञ्ज मनपा वडा नं.११ मुर्ली बस्ने वर्ष ४५ का राजेश लामा छन् ।

पर्साको कालिकामाई गाउँपालिका वडा नं ४ बस्ने वर्ष ४० का राजेश महतो, बारा परवानीपुर गाउँपालिका वडा नं ५ नौतन बस्ने वर्ष ४५ का दरोगा दास, बारा प्रसौनी गा.पा वडा नं ३ नौतन बस्ने वर्ष २५ को दिपु महतो तत्मा, बारा प्रसौनी ६ बस्ने वर्ष ३० का मुकेश साहलाई पक्राउ गरिएको पर्सा प्रहरीका प्रवक्ता डीएसपी निर्मल बुढाथोकीले जारी गरेको विज्ञप्तिमा उल्लेख छ ।