हुम्लाको ६ परीक्षा केन्द्रबाट १ हजार २३४ विद्यार्थी मात्रै एसईई परीक्षमा सहभागी

हुम्ला। यही चैत्र १७ गतेबाट सुरु हुन लागेको माध्यमिक शिक्षा परीक्षा (एसईई) परीक्षमा हुम्लाको ६ वटा परीक्षा केन्द्रबाट १ हजार २ सय ३४ जना परीक्षार्थी मात्रै सहभागी हुने भएका छन् । पछिल्लो समय कोरोना महामारीपछि जिल्ला बाहिर अध्ययन गर्दै आएका विद्यार्थी जिल्लामै फर्किएर पढ्न थालेपछि परीक्षार्थीको संख्या बढी देखिएको शिक्षा विकास तथा समन्वय इकाइ प्रमुख तिलक भट्टराईले बताए ।

गत वर्ष हुम्लाबाट १ हजार १ सय ३६ जना परीक्षार्थीले एसईई परीक्षा दिएका थिए ।

दुई वर्ष लगातार कोरोनाका कारण पठनपाठन बन्द हुँदा जिल्ला बाहिर अध्ययन गर्दै आएका विद्यार्थी जिल्लामै आएर एसईई दिने भएपछि उक्त संख्या बढेको हो । जिल्लाका ६ वटा परीक्षा केन्द्र सिमकोट गाउँपालिकाका २ केन्द्र बालमन्दिर माविमा २ सय ५६ जना र मानसरोवर माविमा १ सय ८० जना परीक्षार्थी सहभागी हुनेछन् भने सर्केगार्ड गाउँपालिकाका हिमज्योति मावि सर्केगार्डमा २ सय ५३ जना र कोटमावि रोडिकोटमा १ सय ४८ जना, अदानचुली गाउँपालिकाको सूर्योदय मावि श्रीनगरमा १ सय ५७ जना र ताँजाकोट गाउँपालिकाको मदानादेव मावि पाँदामा २ सय ४० जना परीक्षार्थी गरी जिल्लाभरिबाट बाट १ हजार २ सय ३४ जना परीक्षार्थीको सहभागिता रहने छ ।

हुम्लाबाट ६ सय ६० जना छात्र र ५ सय ७४ जना छात्राले एसईई परीक्षा दिँदैछन् । जसमा साधारणतर्फ १ हजार १ सय ४८ जना, प्राविधिक धारतर्फ ८० जना र ग्रेडवृद्धितर्फ ६ जना परीक्षार्थीमध्ये १ हजार २ सय २८ जना नियमित र ६ जना साधारणतर्फको ग्रेडवृद्धिका परीक्षार्थी रहेका प्रमुख भट्टराईले बताए ।